L’EDITORIÂL – La fuarce e la fragjilitât

Pal Friûl il mês di Mai al rapresente il moment dal ricuart dal taramot dal 1976 e dai siei muarts. Ma chest an l’aniversari si cjame di un significât particolâr parcè che l’Orcolat si è tornât a dismovi. No lu à fat chi di noaltris, ma sui Apenins, ta chel Abruç che lunis ai 6 di Avrîl al à patît une des tragjediis plui grandis dai ultins agns. Tancj muarts, masse, e che, forsit, si podeve evitâ se cui che al veve di fâlu, al ves fat il so dovê fin dal inizi. Ma chest nol è il timp de polemiche: passade la emergjence al sarà il timp de ricostruzion, la vere sfide di vinci.
In Friûl si à fat “di bessôi” ancje se la solidarietât rivade di dute Italie e dal Mont e je stade grande. Ma chest fâ “di bessôi” e “dulà che al jere come che al jere” a son deventâts la bandiere che e à podût dâ a la int chel riferiment, chê riscuvierte de identitât di un popul che al veve pierdût dut: l’Orcolat al veve sdrumât i paîs, ma no la int.
E ta cheste azion di rinassite, e je stade grande la presince di Glesie furlane, chê glesie nassude “dal bas” che e veve in pre Checo Placerean la sô vuide e che la Curie, “dal alt”, e sopuartave. Ma nol jere dome chel predi di Montenârs: oms come pre Gjulio Ziraldo di Vasinis o pre Pauli Varutti di Bordan, che o ai vude la furtune di cognossi di persone, a son stâts vêrs pastôrs di comunitâts che a corevin il pericul di sfantâsi. A àn vude une funzion di sostegn ancje psicologjic pe int e lis messis par furlan tes tendopolis a jerin dome l’aspiet plui visibil di chel “tignî dongje”, par risurî tornant a scuvierzi lis lidrîs.
Ancje la classe politiche e à vût il mert di fâ il so dovê fint insom: dai sorestants regjonâi ai politics che a jerin a Rome (o fâs i nons dome di Antonio Comelli, Adriano Biasutti e di Arnalt Baracêt, ma tancj si varès di ricuardâ), ducj a àn puartât indevant l’interès dal Friûl che al è tornât a tirâsi sù. E chest al è stât ancje il mert dal guvier che al à afidât al Comissari straodenari on. Giuseppe Zamberletti une autoritât fuarte, che e à savût, adun cui Sindics, meti in vore pal miôr chest prin esempli di autoguvier, cuant che peraulis come “devolution” o “federalisim” no jerin nancje tai pinsîrs des istituzions.
In Abruç cheste componente fuarte di autonomisim no je: il Friûl di chei agns al jere “lontan” di Rome no dome come distance fisiche, L’Aquila invezit e je a pôc plui di une ore di machine de capitâl. E ancje la forme istituzionâl no je la stesse: chi une regjon a statût speciâl cun podês plui fuarts di une regjon a statût ordenari. Cun di plui l’Abruç al ven fûr di un scandul dal an passât che al rint inmò plui delicade la situazion.
Ma i Abrucês a son int che a somein i Furlans: int dure sul imprin, ma ancje buine di vierzisi e dâti il cûr. E cun chest cûr grant e cîr di saltâ fûr dal taramot, parcè che si pues ricostruî cu la ambizion di fâ miôr di ce che al è lât pierdût, salvant ce che al rapresente la lidrîs, la storie, e invezit fasint gnûf ce che al jere stâts fat tai agns 70 o 80. O viôt la pussibilitât e o sint la sperance che l’Abruç al ledi daûr dal esempli dal Friûl pluitost che di chei de Irpinie e dal Belice.
Cualchi volte tu viodis mari e pari di un frut disabil e tu ti domandis dulà che chei gjenitôrs a rivin a cjatâ la fuarce par frontâ une situazion cussì dificile. E pûr, cun dignitât a van indevant. Emergjencis come il taramot di vuê in Abruç, o come chel di îr in Friûl, mi dan la prove che ognidun al à dentri di se la fuarce par tornâ a jevâsi in pîts, salacor plui fuart di prin. E tal stes timp ti judin a fâti memorie che tu sês fragjil e che ogni moment de tô vite, ancje il plui sempliç, al è un tesaur preziôs di rispietâ, parcè che al podarès jessi l’ultin. Ogni zornade e puarte cun se dute la fragjilitât e la fuarce de esistence umane: i tocje a ognidun di nô dimostrâ che la scomesse e pues jessi vinçude ancjemò une volte.
Toni Capuozzo