MEDITANTLIS TAL SO CÛR. Un dolôr umiliât

Intal câs di Eluana, i unics che a plen dirit a puedin cjacarâ a son chei che a àn un câs simil in cjase. Ducj chei altris, jo comprendût, o vin di tasê o di fevelâ dome alc e cun grant rispiet e moderazion. O vin di metisi cuintri de baraonde mediatiche che e je sucedude.
Une femine che di une vite e viôt de fie clamade cuntun eufemisim galiot «diversamente abile» mi à dit: «Prime di cjacarâ, ducj a varessin di provâ almancul par un mês ce che al vûl dî vê un disabil in cjase». O cognòs paris e maris che no puedin murî par vie che no san in ce mans che al rivarà il lôr frut o frute; altris a disin: «O prei che al muri prime di me». O sai dal câs di un om che al viôt de femine malade e che ogni tant al dîs: «Se e fos muarte, le varès vaide par un mês e cumò o sarès in pâs». Mi diseve un om che al à patît a no finî: «O crôt ancje jo al Diu dal Vanzeli, ma se o cjatàs un altri Diu che mi des la salût lu cambiarès subit». Mi confidave un predi: «Intal dolôr la fede no baste».
La gjerarchie catoliche, che intal câs di Eluana e à fat il pestefruç, e varès di sedi tant plui caste intai sintiments e tant plui moderade intes sôs sigurecis e intervents. I vescui, di chel che si sa, no àn nudrît un fi, no san ce che al vûl dî vê une famee, no son stâts sot la crôs come la Madone che e sintive il fi a berlâ: «Diu gno Diu gno parcè mo mi âstu bandonât?». Il clericât di secui in ca al è il mancul adat a sentenziâ su chestis tragjediis.
Bisugne zontâ che la gjerarchie catoliche e à doi pês e dôs misuris: intal câs dal pari di Eluana e à fat la fin dal mont; no si compuarte compagn cui gjenerâi che a mandin a murî i soldâts in Iraq o intes leucemiis provocadis des bombis, che anzit e clame dut chest «mission umanitarie» e ur regale vescui, capelans, elogjos e i sants sacraments.
Il Vatican, improibint ogni pratiche contracetive, al lasse che in Afriche a nassin fruts cul Aids, o distinâts a murî di fam, di miserie e di berlis; al permet un stragjo dai inocents pluitost che riviodi regulis che a son di riviodi. Biel esempli di serietât e di maturitât!
O capìs il pari di Eluana che al à sierat cun dopli clostri la puarte al mont catolic!
Il rest, dute une prosopopee di articui, intervistis, intervents dai politics… une vere Babilonie che no aparten a la mentalitât dal popul furlan. Cheste, e sarà la grande Italie, ma no il nestri Friûl! No rivi a viodi un cjargnel a manifestâ il dolôr in chel putiferi che al è stât; o pensi che i massmedia cui lôr inteletuâi, politics, miedis e teolics nus vedin, se o sin furlans, propit stomeâts. In plui, la conclusion e je che o savìn pôc o nuie.
La nestre int, almancul fin a chê altre dì, e viveve lis tragjediis cun grande dignitât, e deve une man, no leve a berlâ in place.
Mi somee che intal câs di Eluana il dolôr di un pari e di une famee al sedi stât umiliât, smenteât, ignorât.
Intal dibatit che al è començât no sai ce leçs che a vignaran indevant; o speri che al resti su dutis il principi uman e evangjelic che nol è fat l’om pe salvaguardie de leç, ma la leç pal ben dal om.
E cumò o tâs ancje jo. O voi cul pinsîr tal cimiteri di Paluce; li, une persone e la sô famee, cuntune spine tal cûr, a continuin a domandâ un pôc di cidin, di rispiet e di dignitât.
pre Tonin Cjapielâr