E DUCJ A VIVERIN… FURLANS E CONTENTS. La biele indurmidide

A jerin une volte, a Udin, un re e une regjine, cuntune frutute bielissime a pene nassude. Par fâi fieste, a clamin tal cjistiel dutis lis fadis dal Friûl, e ognidune e puarte un regâl pe frute: la fade de Basse e puarte la bielece dal mâr, la fade dal Tiliment e puarte la fuarce di tornâ simpri a tirâsi sù come lis risultivis, la fade dal Nadison e puarte la pazience di sopuartâ lis invasions, e la fade cjargnele e puarte un toc di polente e un frico, cence tant tabaiâ.
Par ultime e rive la fade de Bisiacarie, che no jere stade invidade.
“Tu vevis di invidâle tu!”, e dîs la regjine.
“Tu mi vevis dite di clamâ nome lis fadis furlanis!”, al dîs il re. “Tu sâs che no mi visi mai se la Bisiacarie e je furlane o no.”
“Bon, zonte un plat di luianie e fâs fente di nuie.”
Ma aromai al è tart: rabiade pe dismenteance, la fade de Bisiacarie i fâs une maledizion ae frute: a pene che e varà 16 agns, si becarà cuntune urtie lavorant tal ort e e durmirà fin cuant che un princip no le dismovarà.
“Puare la mê frute”, e dîs la regjine.
“16 agns? Propite cuant che e rive la etât di lavorâ?”, al dîs il re. E par salvâ la frute, al fâs une leç par improibî i orts par dut il Friûl.
Ma naturalmentri i furlans, che a àn rispiet pes leçs ma ancjemò plui pal ort, lu fasin istès, e cussì a 16 agns une dì, lant ator cence fâ nuie, la frute e cjate, taponât di un mûr di cente, un ort plen di cocis, cocins, pomodoros e ogni ben di Diu. La frute e slungje une man par robâ une vuaìne, e tocje une urtie e e cole jù indurmidide.
“Ce dordele!”, al dîs il re, “le vevi ancje visade!”, e le met jù intun jet taponât cuntun veri, tal mieç dal bosc, par fâle cjatâ miôr (parcè che i princips, si sa, a passin simpri tal mieç dal bosc).
Naturalmentri, cualchi an dopo un princip, lant a urtiçons, al cjate la frute. Le cjale un moment: e je bielissime. Alore i va dongje par bussâle e par dismovile, ma jê, prime di cjapâ la bussade, tal sium si volte di chê altre bande e e dîs “Ancjemò cinc minûts!”.
“Une che e duar cussì tant no pues jessi furlane!”, al dîs il princip, e le lasse li.
Al veve reson: la frute e jere stade scambiade te scune. Chê indurmidide e jere une triestine, e la vere principesse e jere la parone dal ort dulà che la fente principesse si jere becade.
“Mi someave strani che mê fie e fevelàs simpri disint zo, xe e no se pol!”, al dîs il re, e al fâs une fieste cun dutis lis fadis dal ream (ancje chê de Bisiacarie, cheste volte).
Cussì il princip si maride cu la principesse furlane, e chê triestine e reste indurmidide.
E ducj a viverin furlans e contents.
Lis flabis di Bete di Spere