Lucio al stave trancuîl. Al spiave il zardin denant de cjase di Franco, movintsi planc sul divan a niçul tal sotpuarti. Franco mi contave, e jo o butavi un voli par viodi se il vecjo niçul al tignive bot ai 112 chilos dal gno piçul. Lis vecjis sustis a varessin bevût vulintîr un got di Svitol, ma a ‘nt vevin passadis di piês.
«Chel Sabau al jere un bon frut. E ancje la Marie. Jê e lavorave, ma la cjase le tignive tant che la sale di un dentist. A pene che e à molât il lavôr, cun tant di panzon, si è metude a voltâ la tiere par slargjâ l’ortut. Lui nol jere robe di ostariis… al jere abonât a “Tuttomotori”. Ogni tant, cualchi pac de Cine (la solite cragnarie eletriche che a cjolin su internet e che no si rive mai a imbusâ te casselute des letaris), e plui di râr une cartuline de Romanie, ma pal rest, no si saveve che al fos. Par dîti, no ur ai mai puartade une cartele di Equitalia, o une multe, e in dì di vuê…».
«Nancje une multe?», lu interomp. «Marie mi à dit di un multe, timp fa…».
Franco si met a ridi.
«Sì, la multe di Pieri Renturin!».
«Eh?!».
Franco si met a contâ che e zirave la vôs che Pieri al veve cjapade une multe, cu la sô machine, intant che al jere ator cuntune siore che no jere la sô. Par prevignî i dams cu la sô femine, al veve tirât fûr dal sachetin la bale che al veve prestade la machine a Kosim, par fâi fâ biele figure cuntune femine, e che chel pote al veve profitât de sô gjenerositât, si jere metût a cori come un sassin e al veve cjapade une multe. «Viodistu, a fâ dal ben?», i veve dit Kosim ae sô femine. E ce altri podevial fâ cul fi dal paron? I veve tignût il sac.
Jo o cognossevi Kosim, e soredut o cognossevi Pieri Renturin. Kosim, doi minûts che lu vevi cognossût, al veve tirât fûr il telefonut par mostrâmi Marie che e jere ancjemò a Timisoara a spietâlu. Cuant che si fevelave di feminis, come che si fevele tra coleghis mascjos, cun vantariis e monadis, lui al stave zito e di bande.
Pieri, cuant che si fevelave di feminis, al jere chel che le veve di sglonfâ plui gruesse. Lui al veve taconade la putane plui frice in Austrie; lui, intant dal Meeting di Nuova Eucarestia, al veve convinte une zovine, che e voleve restâ vergjin, che al esisteve simpri un “plan B”; lui al jere stât in “viaç di lavôr” in Thailandie; lui al cognosseve miôr di ducj la psicologjie feminîl e al saveve che par tignî sot la tô siore, come che tu viodis che i fruts i dan un lamp di respîr, tu âs di tornâ a jemplâle. A Pieri i plaseve tant jessi, in plui che un pari di famee esemplâr, un mestri di vite. Mi pareve di viodilu, Pieri, denant de machine dal cafè ae CAMIN, che mi contave de furbade de multe. Pieri si sintive un mestri di vite a contâmi cemût che al parave ator la sô femine, tant che no si inacuarzeve che jo mi vergognavi par ducj i doi, e che o spietavi dome che si decidès a dâmi la comande, par podê stâ dôs o trê oris cence viodi la sô muse di purcit.
«Ma, ‘Sef, no tu sâs ancjemò nuie, crodimi!».
Jo mi ricjapi dai miei pinsîrs e o cjali i voi di Franco. Voi dulà che il blanc al jere deventât un zalit, avonde alarmant.
«Dimi…».
«No tu sâs cui che e jere la femine te machine cuant che al à cjapade la multe!».
A Franco i plaseve contâ. Tirâ pes lungjis.
«La siore in cuistion, che po tant siore no jere, e jere la badante dal barbe di Pieri Renturin. E jere la Ivanka! La cravuate che e sarès scjampade cun Sabau».
«Ce robe?!».
Franco al riduce. «Âstu capît, cumò?».
Jo mi lassi colâ cuintri dal schenâl de cjadree, che e crice no pôc, ma e ten.
Indulà mi jerio lât a imbusâ?
(5, al va indevant)
Igor Londero
