Intal paîs dal len, ven a stâi a Sudri, dal 2019 e à viert la buteghe “Woonik”, di une idee origjinâl nassude dal zovin Nicola Marsilio che al è il titulâr. “11 agns fa – al conte – finide la scuele, o ai tacât a lavorâ inte aziende di mobii de mê famee, che fin al 2002 le gjestive gno nono, po la ativitât e je passade a gno pari che al è il titulâr, e jo o fasevi il marangon, dipendent. Intai moments di pôc lavôr nus è vignude la idee di provâ a fâ borsetis di len. Il prodot al plâs e o vin vût une cierte rispueste. O vin inventât alc di artesanâl, di nicje e che nol è par ducj. O vin partecipât a diviersis fieris par fâsi cognossi e o vin fat ancje un event cun Miss Italia. La dificoltât plui grande e je chê di cjatâ il marcjât just indulà podê meti in vendite il prodot. In cierts puescj tu âs plui tîr e tu rivis a vê une cierte clientele. Achì di nô al è plui dificil. Mi rint cont che al è un prodot limitât e no pes sachetis di ducj. O rivìn a fâ cirche 8 borsis al mês. Dongje des borsetis o fasìn ancje tacuins. Il materiâl doprât al ven de Cjargne – tant che il noglâr, il rôl che o vin recuperât dopo de burascje Vaia e il miluçâr cjargnel che nol ven doprât pe mobilie, ma par chest lavôr e che al è adat parcè che al à une vene biele e particolâr – ma ancje di fûr, tant che il cjariesâr (in Cjargne al è dificil cjatantint), il palissandri indian (une volte al jere calcolât un len nobil), l’eban african e il zebran african (che al à une vene zebrade). Te borsete al ven metût un spessôr dai 2 ai 4 mm di len. La borsete e je fate ancje cun tocs di piel (che le comprìn di fûr regjon) e e je piel vere par sielte e par filosofie di doprâ ce che si cjate in nature. Nô o sin orientâts in chest sens, ancje se o vin cuintri i animaliscj… ma tal mont de mode al è cussì.
◆ Par fâ une borsete a coventin di 5 a 6 oris, la lavorazion e je dute manuâl (90%) e peade al artesanât di une volte, i machinaris di vuê no rivin a fâ un tant. Lis borsetis a son simpri onzudis par conservâ chel lôr lusôr naturâl, e no vegnin sborfadis cun vernîs e solvents. Il prodot al è dal dut naturâl! Cui che al compre la borsete al sa che al pues vê problemis cu lis temperaduris altis; e je simpri une robe vive. La borsete finâl e je lizere.”
◆ Dopo dal Covid, Nicola al à pensât di fâ marketing cjapant cualchi contat inte zone di Milan par promovi il prodot, e il risultât al è rivât: “O ai cualchi borsete che e je in esposizion – al conte – e si pues comprâ, intes vetrinis di cualchi boutique di Milan dulà che a si vendin prodots di nicje. Mi pâr nuie mâl par un prodot fat in Cjargne!”.
◆ Cui che nol vûl o nol pues movisi di cjase, al à la pussibilitât di curiosâ tal sît https://woonik.store/, sielzi ce che i plâs e, parcè di no, ancje personalizâlu e fâsal spedî. I prodots Woonik a son lâts ancje in Canadà e tai Stâts Unîts.
“Tal gno setôr – al dîs Nicola – il presit spes al devente proibitîf: al è dificil viodi achì di nô une zovine cuntune borsete nestre… a Milan invezit al è plui facil. No vin ancjemò cheste mentalitât: chest, forsit, al podars jessi une dificoltât di cheste ativitât.”
◆ Ogni prodot al à la etichete “made in italy, made in Carnia”.
Par cualsisei altre curiositât, dongje dal sît, e je ancje la pagjine Facebook https://www.facebook.com/woonik.store ❚
