Svolte Pop par Priska, ma dome cuntun toc par furlan: il gnûf disc

A son passâts 5 agns dal sô ultin lavôr “Eppure ti vedo ancora” che la cjantautore Priska e ven fûr cuntun gnûf disc: “Souvenir de Printemps” (etichete indipendente “La Chouette”), presentât ai 28 di Avost a Vençon. Vot tocs par francês, talian e furlan, cun jê ae vôs, ghitare classiche, acustiche e eletriche, bas, tastieris e omnichord; Luca Brunetti ae ghitare eletriche, bas, tastieris e programazion e Louis Armato ospit cu la sô ghitare acustiche tal toc Ailleurs. La artiste di Pluver, che e je ancje professore di ghitare tes scuelis mediis a orientament musicâl de provincie di Udin, e je nassude in France e feveli lis trê lenghis.
–––
Priska, ti cjatìn daspò di 5 agns. Ce âstu fat in dut chest timp?
O soi simpri lade indenant a sunâ. O soi stade invidade a esibîmi ancje in Slovenie, Svuizare e France. E o ai simpri regjistrât, scrit… scrit e regjistrât in chescj agns. Il risultât al è “Souvenir de Printemps” (ricuart de Vierte), che o ai scrit i tescj e lis musichis.
–––
Ce rapresential pe tô cariere di artiste chest gnûf lavôr?
Rispiet a chei altris cd, i gnûfs tocs a son plui “pop”, e cun plui rangjaments. Al è un lavôr che o ai curât tai detais, cu la colaborazion di Luca Brunetti, che al è ancje curadôr de grafiche dal disc.
–––
Di ce contino i tocs?
I tescj a fevelin di sensazions, par esempli Hajra al è un ritornel che mi soi insumiade une gnot. Cirint su Internet o soi capitade sul non di Hajra Catic, femine bosgnache che e à pierdût l’om e il fi in timp de vuere de ex Jugoslavie. Mi soi ispirade ae sô storie dramatiche par scrivi une cjançon di amôr li che il so om i fevele. O pûr in Fatina, che e je une ninenane par adults, o Le nouvel an li che une femine e fevele a une frutine e i augure di jessi sburtade dal vint di Nordest e niçade des ondis celestis. I tescj a son dispès onirics, parcè che si sposin benon cu la mê musiche.
–––
Cemût mai la sielte des trê lenghis?
Jo o soi nassude in France e fin a 6 agns o ai cjacarât dome par francês. Po cui miei o sin tornâts in Friûl e alore a son rivâts il furlan e dopo il talian. O dopri lis trê lenghis pes mês produzions, e la sielte di une o di chê altre e ven dade de musiche: al è il sun che mi puarte di une bande o di chê altre, che mi ispire. Il francês al è chel che o dopri di plui, parcè che la sô dolcece si adate ben ae musiche che o fâs.
–––
Al è dome un toc par furlan. Cemût isal nassût?
Mi impensi che o vevi cjatade la musiche, e la sielte di scrivilu par furlan e je stade imediade. No ai vût dubis che il toc Lontan, che al cjacare dai timps cuant che al è facil fâ promessis che però no laran lontan, un toc malinconic, nostalgjic, al fos par furlan. Dificil spiegâ il parcè, ma o sint sunâ e o capìs la lenghe plui adate.
–––
Dulà podìno scoltâti?
Ai 16 di Otubar o sunarai i tocs dal gnûf cd a La Girada di Udin. Par tignîus inzornâts al è ancje il gno sît www.priskamusic.com. ❚
DISCOGRAFIE
Diplomade in ghitare classiche al Conservatori di Udin, tal 2004 Priska Benelli e tache une colaborazion cul cjantautôr Lino Straulino. Al nas cussì il prin disc “La fureur de Papavoine” (etichete Nota, 2006). Tal 2010 al ven fûr “Eppure ti vedo ancora” (Nota), publicazion di 12 cjançons, li che Priska e je autore des musichis e di part dai tescj (chei altris a son di Lino Straulino e Alessandro Hellmann). Il 2015 al è l’an di “Souvenir de Printemps” (etichete indipendente “La Chouette”): 8 tocs par francês, talian e furlan. ❚
Natascia Gragano