VIERZIDURE – Il destin dal furlan al è leât a la Europe

William Cisilino al è il gnûf diretôr de ARLeF: za diretôr dal Servizi Promozion de identitât de Provincie di Udin e Responsabil pe tutele des lenghis minoritariis de Regjon, al à cumò la funzion di direzion operative de Agjenzie che e soreintint ai sfuarçs par fâ doprâ di plui la “marilenghe”. Un compit dificil, che dut câs il zovin dirigjent (al à 37 agns) al fronte cu la fuarce de competence e de passion che al à madressudis intai agns. «Ancje se la lenghe e je fevelade mancul jenfri dai zovins e dai fruts – nus dîs – e je vere che a son cumò tancj mancul prejudizis che cualchi an indaûr. E lis gnovis tecnologjis a puedin judâ, adun naturalmentri a une fuarte azion inte scuele». La ARLeF e pues jessi l’imprest just par dâ cuarp ae politiche linguistiche: «lu disin lis esperiencis dal rest de Europe, ancje se in situazions une vore indevant te tutele come Catalogne e Gales lis politichis classichis di promozion de lenghe a scomencin a mostrâ la cuarde».
E alore, ce fasarano i piçui popui? «O riten – nus spieghe – che l’avignî des lenghis, des piçulis soredut, si pearà al destin de Europe: se la crisi economiche e determinarà il tornâ dai Stâts-nazion, la partide e sarà une vore plui dure. Pal contrari, se la Union e vignarà fur dal burlaç che e je dentri si larà simpri di plui viers di un pluirilinguisim là che al sarà dal dut relatîf il numar di chei che a fevelin par dâ dignitât ae lenghe». Cetant impuartant pe ARLeF al sarà leâsi aes altris realtâts furlanis. Cisilino, che al ven dal mont des associazions culturâls (al è stât president dal Istitut Ladin furlan Pre Checo Placerean) al siere disint che «la Agjenzie e à il compit di fâ cressi la plui largje colaborazion jenfri dai organisims publics e privâts che a lavorin pe valorizazion de lenghe e de culture furlane. In Friûl o vin la fortune che a son tancj e une vore bogns. Al bastarès dome un minim di coordenament, tal rispiet de autonomie di ognidun, par fâ grancj pas indevant».
Walter Tomada