Valôrs identitaris e imprenditorialitât. Il cors par jessi ambassadôrs di un Friûl gnûf ator pal mont

A son partîts dal Friûl cu la valîs di carton, platâts inte panze di nâfs plui grandis dal borc li che a vevin simpri vivût e che par lôr al jere il mont cognossût. Intes sachetis, une fotografie e un biliet cence tornade par tieris lontanis li che a varessin cjatade fortune e, forsit, cualchi paisan a spietâju. Dentri dal cûr, un grop clamât Friûl, masse puar par podê contentâsi ma masse penç par podê jessi parât jù.
◆ Di chei migrants, forsit un o doi a faserin fortune, cualchidun al cjatà bonstâ, i plui si lassarin lâ al drandran intune culture gnove, e forsit a rivarin ancje a integrâsi. Plantât tant che un curtìs intai budiei, dut câs, al restave il ricuart di chê tiere aromai smavide ma mai dismenteade.
◆ Aromai, tancj di lôr a son muarts, cualchidun nol pues plui viazâ biel che altris si son rindûts a clamâ cjase un altri puest e in altris lenghis. La nostalgjie, dut câs, e je une sensazion che e viaze cul pinsîr e e je buine di tacâsi intor ancje a chei che no àn mai viodude pardabon chê tiere tant suspirade. Al sucêt cussì che pai nevôts di emigrants, drets o ancje di seconde, tierce o cuarte gjenerazion, il Friûl al vedi la nomee di puest mitic, di scugnî viodi timp o tart inte vite, no fossial che par sierâ il dissen di un cercli scomençât secui prime.
◆ Dal 2010, la Universitât dal Friûl, cu la poie de Regjon e di Ente Friuli nel Mondo, e da la pussibilitât ai zovins dissendents di emigrâts furlans di cjapâ part al cors di perfezionament “Valori identitari e imprenditorialità” (150 oris tra teorie e pratiche), li che, dongje di lezions di comunicazion e plurilinguisim, linguistiche (taliane e furlane), patrimoni culturâl, tradizions, economie, visitis vuidadis sul teritori (Udin, Aquilee, Cjase Cocel a Feagne, Cuar di Rosacis) e seminaris, e je ancje la ocasion par fâ pratiche intune aziende o istitût dal puest.
◆ In ducj chescj agns, il progjet, rivât ae 13ce edizion e coordenât de professore Raffaella Bombi, al à vude la partecipazion di uns cent arlêfs. Ancje par chest an, fin ai 9 di Lui, 11 zovins, ducj de Argjentine (Josè Maria Bressan, Carla Belen Fellò, Maria Soledad Gallardo, Maria Paula Scarpin, Giovanna Santi di Resistencia, Paula Irene Brollo Garcia, Maria Agustina Rizzi, Cristian Gabriel Nunez Grion, Tamara Estefania Faccioli, Maria Fernanda Moyano Sella), ma cun vons partîts di Caprive, Glemone, Midun, Pesariis, Tarcint Udin e Visc, a varan la ocasion di cognossi miôr cheste tiere e di tornâ a cjase tant che ambassadôrs di un Friûl gnûf e di une gnove realtât taliane.
◆ E cuissà che, magari, cualchidun nol decidi di restâ par fâ di cheste regjon la sô cjase e par dissegnâ il cercli di un avignî gnûf propit tacant di chenti. ❚