TV FRIÛL E CJANÇONS. Ancje nô o vin la nestre telenovele

Al torne Dallas! Plui di vincj agns dopo de fin de ultime pontade, al è tornât par television un dai telefilms plui famôs de storie, chel cul petrolîr trist J.R., Sue Ellen, Bobby e lis lôr storiis di fameis rivâls ambientadis te omonime citât dal Texas.
Cussì, ancje la tv furlane e rispuint cuntune cuintriprogramazion esclusive: Dalès. Une storie ambientade intune tiere plui salvadie che mai: chê zone indefinide de Pedemontane che e je tra la Cjargne e il Friûl. Come a Dallas, ancje a Dalès (comun di Trasaghis), dôs fameis si scuintrin pal aur neri plui preziôs di ducj: il cabernet.
J.R., iniziâi di Jacum Ruspi, al vîf a Dalès intune vile denant dal lât di Cjavaç ma al è paron di un grum di vignis ator pal Friûl, al vûl vendi il non dal Cabernet ai ongjarês, che dopo che si son cjolts il Tocai a àn cjapât gust e a vuelin scomençâ a clamâ dut cui nons furlans. Par fortune al rive Berto, il fradi bon, che scuvierç ducj i siei plans e al prove a fermâlu, cu la menace di gjavâi la sô Ape Piaggio (J.R. al è plen di bêçs, ma al è simpri un furlan de Alte!).
Ma J.R. al romp i cits a dute la popolazion di Dalès, e prest il mâl che al fâs i torne indaûr. La prime stagjon e finìs cuntun grant misteri: cui aial sparât a Jacum Ruspi?
La soluzion e rive cun la stagjon dopo: al è stât un cjaçadôr che al voleve becâ un masurin tal lât. J.R. al è stât cjapât nome di sfris, al sta ben e al continue a fâ lis sôs tristeriis e par svindic al cope ducj i masurins che al viôt.
La stagjon dopo al mûr Berto, il fradi bon, ma dopo un pocjis di pontadis si discuvierç che al jere dut un sium de sô femine che e veve bevût un tai di cabernet di masse.
Ogni pontade di Dalès e dure une ore: dîs minûts di lotis, amôrs e segrets, cincuante minûts di lavôr.
Ae fin de serie televisive, Bobby al rive a fermâ J.R. prime che al vendi ai ongjarês il non “muset” par clamâ il gulash. E dut al finìs cu la famose sigle “Ce grande, ma ce grande che je la Patrie!”. ■
BETE DI SPERE