Une voglade sul Friûl di doman

Dario Zampa nol à dal sigûr bisugne di jessi presentât lu cognossin ducj sedi i furlans di chenti, sedi chei che a son emigrâts. La sô cariere artistiche e je pardabon lungje e siore, al è stât il protagonist e al à creât une vore di spetacui musicâi e televisîfs. Pe television, une des robis plui impuartantis che al à fat, e je dal sigûr une serie di documentaris zirâts jenfri i emigrants te Americhe dal sud: Bolivie, Paraguai, Venezuele, e vie indevant. In ogni pontade al contave la storie di un personaç talian emigrât in Sud Americhe, lant a viodi il puest dulà che si jere trasferît e cemût che e jere cambiade la sô vite. Dario Zampa ju cognòs ben i emigrâts, chei che agns indaûr a àn lassât la nestre tiere, ma ancje chei che a vegnin chenti di altris bandis dal mont. “Cui che par prin al à cûr di lassâ il so paîs, che al rive a lassâ la sô tiere, al è la part miôr de societât, chê plui ative, che e à plui snait: baste pensâ ce tante strade che a àn fat i furlans tal forest” al dîs. La ultime trasmission che al à fat par Telefriuli e je Friûl 2036: 20 pontadis ladis in onde dai 3 di Març ai 9 di Lui la sabide daspomisdì. Finalmentri une trasmission che no fevele dome di tradizions, ma che e cjale indevant e e pense a cemût che e sarà la nestre regjon fra trente agns. “La trasmission e jere stade pensade par jessi trasmetude tal 2006, trente agns daspò dal taramot. In chescj trente agns o vin fat sù i mûrs, tai trente agns che a vegnin o vin di fâ sù i furlans!” al dîs Zampa. Friûl 2036 al à metût dongje aes parts in studi, lis intervistis fatis ai sorestants, ae int comun e ai imigrâts cul obietîf di resonâ insiemit sul futûr de nestre identitât, de nestre lenghe e de nestre tiere. Par Zampa al è impuartant rivâ a fâ capî ai imigrâts dulà che a son vignûts a stâ, cualis che a son lis carateristichis dal Friûl. “La int foreste che o vin intervistât, e jere braurose di fâsi sintî a fevelâ par furlan, di fâ viodi che e je integrade. No si sintin obleâts a imparâ la nestre lenghe, a sielzin lôr di fâlu parcè che a capissin che ur conven. Un non par ducj? Daniel Samba, lui sì che al à capît subit la impuartance des identitâts, lui il Friûl si lu gjolt, no lu subìs”.