«O ai cualchi dubi su la mê abilitât di fotograf ma nissun su chê di marangon» al diseve di se Sandro Becchetti.
◆ Roman, classe 1935 e muart intal 2013, la sô e je la storie di un anti-paparazzo e i ritrats dai siei “protagoniscj” a son sculpîts cu la netece dal scultôr dal len. Par cuindis agns, dal rest, al à molât di fotografâ e al à passât il so timp a intaiâ figurinis che dopo al piturave.
◆ De seconde metât dai agns ’60 Becchetti al à descrit il nestri Paîs imortalant centenârs di grancj mestris de culture e de art intun percors finît su lis pagjinis dai gjornâi di mieç mont, e Rome e je simpri stade al centri.
◆ Dai prins clics, cuant che, rapît dal incjant pe grande bielece de citât eterne, a ‘nt fasè un ritrat «clap par clap», fin a dute une schirie di ritrats dai grancj mestris de art e de culture talians e internazionâi.
◆ Un dai siei lavôrs plui famôs al è su di un furlan: Pier Paolo Pasolini. Intal 1971 al fasè un servizi fotografic pal cuotidian “Il Messaggero” fotografantlu inte sô cjase ae Eur, in vie Eufrate 9, dulà che al viveve dal 1963 cu la mari Susane Colussi e le cusine Graziella Chiarcossi.
◆ Un servizi fotografic che al ven mostrât li dal Centri studis Pasolini di Cjasarse fin ai 11 di Otubar cun la esposizion “Pieri Pauli Pasolini traviers il voli di Sandro Becchetti: framents di une narazion”, curade di Valentina Gregori.
◆ Il percors de mostre al cjape dentri ancje i ritrats dai amîs plui cjârs di Pasolini, di Bernardo Bertolucci a Dacia Maraini, e dopo Natalia Ginzburg, Federico Fellini, Giuseppe Ungaretti.
◆ Vie pes stanziis di Cjase Colussi si puedin amirâ ancje lis pocjis imagjins in blanc e neri de orazion funebre tignude di Alberto Moravia a Campo dei Fiori ai 5 di Novembar dal 1975, in ocasion dai funerâi di Pasolini. ❚
