«La peraule clâf e je convivi par mês cul virus e rispietâ in maniere individuâl lis regulis par no infetâsi. Intal timp, o varìn plui cognossincis su cemût che si difont il Sars-CoV-2, plui farmacs e plui struments di diagnosi, ma lu batarìn dome cu la imunitât di trop dade de vacine, ma che no rivarà prime de fin dal an». Peraule dal professôr Silvio Brusaferro. Furlan di Udin, al è il president dal Istitût Superiôr di Sanitât e al è sot a frontâ chê pandemie che e sesele miârs di vitimis e che e je daûr a meti in zenoglon la economie globâl.
I talians a àn imparât a cognossilu intes conferencis stampe cul boletin zornalîr su la infezion. Numars che a son vitis crevadis, mapis, grafics, indicazions par difindisi. «Dismenteìnsi di stradis e di mieçs publics folcjâts. Cumò o vin di frontâ une fase delicade e dificile che e je chê di cambiâ un pôc lis nestris vitis e, cun cautele, un pas daûr chel altri, di provâ a tornâ a partî», al sclarìs. O ben, cjatâ un mût par convivi cun cheste infezion, fasint in mût che e ziri il mancul pussibil.
Brusaferro al è rivât a Rome intal Zenâr dal 2019, nomenât Comissari straordenari dal Istitût. Vuê al è president e al fâs part ancje dal Comitât tecnic sientific. Il Guvier si è rimetût a lui par cirî di frontâ la emergjence. Maridât cun Gianna, dôs fiis, catolic di centriçampe, «al è un grant lavoradôr, cuntune capacitât organizative straordenarie» a disin di lui tra lis corsiis dal ospedâl di Udin.
Professôr di igjiene e medisine preventive, intai agns 90 diretôr dal ospedâl di Glemone, un pît in Friûl e chel altri intal mont cun incarghis internazionâls, al è stât dopo diretôr dal Dipartiment de aree mediche de Universitât dal Friûl e de gjestion dal pericul clinic de Aziende sanitarie universitarie integrade de capitâl furlane. Cundut de incarghe nazionâl a Rome, nol à mai molât di tornâ ducj i fin di setemane in Friûl: tra lis sôs monts amadis, sal visin ancjemò «rivâ a pît cul so russacut su pes spalis, une persone semplice e pulide». A sperin di tornâlu a viodi in curt, parcè che al volarès dî vê cjatade une soluzion ae pandemie. ❚
