Une vite dedicade ae scuvierte e ae conservazion de nature. Par frontâ la crisi dal nestri ecosisteme – dal desert dal Sahara ai glaçârs de cjadene dal Himalaia – a coventin nivei di competence adats ai timps e l’insegnament di Ardito Desio si mostre fondamentâl.
A memoreâ l’esploradôr e mestri al è il Fogolâr Furlan di Rome. Desio, nassût a Palme intal 1897, al à partecipât ae spedizion dal Karakorum e al à scuviert i bacins periferics dal Baltoro, la Siele Conway, il pas Mustag. E po dopo ancje lis monts de Persie, la Antartide, la Birmanie, il Tibet. Al è stât il prin a meti pît su la cime temibile dal K2.
Chê concuiste lu à svicinât ae int comune e soredut a un grant numar di zovins e al è propit par lôr che al à fat il so ultin progjet: un laboratori di studis des altis cuotis al cjamp di base dal Everest.
«Desio al è un compendi di indurance, competence e interès cence confins intune vision proietade tal futûr», al sclarìs il president dal Fogolâr Francesco Pittoni. Origjinari di Dimponç di Tumieç, si emozione visantsi di cuant che al à acompagnât Desio dal president Carlo Azeglio Ciampi inte dì dal so ultin complean, e al marche: «O sin chi par memoreâlu intal ambit de rubriche “Fradae e Culture” parcè che la nature dal furlan dispès si spiegle in chê dal propri teritori, un “minimundus” pe molteplicitât di culturis, vicendis, paisaçs e nature. Propit come che al jere Desio».
E cussì, tant par confermâ l’inviâsi di un viaç gnûf, l’archivi complet dai scrits di Desio al sarà trasferît di Rome a Udin, al Museu Furlan di Storie Naturâl. ❚
Floriana Bulfon
