Une celebrazion di unicitât e di tradizion Dal Galles, Gwenno ospite in Friûl

La musiche a difese de diversitât. Une colone sonore brilante che e rapresente la rivoluzion politiche, feministe, sociâl e culturâl che e sta cressint in dut il mont, cussì ancje te regjon dal Galles e tal Friûl, e si riflet tal galês e tal furlan tant che lenghis minoritariis.
Chest al è juste un toc di ce che si pues contâ de art di Gwenno Meredid Saunders, la artiste di Cardiff, che ai 9 di Jugn tal curtîl di cort Morpurgo a Udin e je stade la ospite di ecezion di SUNS, il festival des arts tes lenghis minorizadis che come ogni an al va ae discuvierte di musiciscj unics.
Gwenno e à une vôs lizere, cuasi magjiche, che e esplore la musiche e i suns e nus traspuarte intun mont dal dut fantasiôs e di esplorâ. Dut chest in marilenghe, no par furlan ma par galês.
In visite a Udin – che, come che nus conte, «e somee tant ae mê citât di nassite, dulà che ducj a doprin lenghis diviersis e il Welsh e il Cornish a son fevelâts di cuasi 600 personis» – la artiste e à incantesemât il public, proponint i tocs dal so album “Y Dydd Olaf”.
“Y Dydd Olaf”, vâl a dî “L’ultin dì”, al è un album basât sul libri sci-fi di Owain Owain dal 1976. Jessût tal Otubar dal 2014, al a za fat il zîr dal mont, vincint ancje il “Welsh music prize“.
Un progjet che al met dongje un schirie di tocs là che melodie, eletroniche, indie, pop e folk si misclicin, cu la vôs inmagante di Gwenno che e cjante par galês e cornic.
Tra euforie, rabie e dolôr e cun grande creativitât, lis nûf cjançons a fevelin di globalizazion e di manipolazion mediatiche, patriarcjalisim, control culturâl, tecnologjie, propagande, declini des lenghis minoritariis. E infin, si fevele dal timp, “Amser”, cun la interpretazion de artiste dal poeme in cornish di so pari e poete Tim Saunders.
«Jessint cressude cun trê lenghis, o ai vude la pussibilitât di cjalâ la societât intune altre prospetive. O soi dal sigûr plui sensibile aes tematichis sociâls in gracie de influence dai miei gjenitôrs, ma dome vê podût esprimimi in chestis lenghis minoritariis, pôc consideradis, mi à dade la oportunitât di capî trop che chestis a jerin vulnerabilis.»
«Cussì, come che a son vulnerabilis ancje dutis chês altris minorancis, che a sedin linguistichis, sociâls o culturâls. O vin par chest di continuâ a protezilis e a scombati par puartâlis indenant.»
Gwenno e à une storie artistiche impuartante e e gjolt di une cierte innomine a nivel internazionâl pe sô ativitât: dal 2005 al 2010, e à cjantât e sunât cul grup pop The Pipettes e cun chest album e à tacade la sô cariere di soliste.
«La idee di cjantâ te mê marilenghe e je nassude cuant che, dopo ve zirât il mont, o soi tornade a cjase. A Cardiff, che in galês si dîs Caerdydd, o ai podût tornâ a conetimi cu lis mes lidrîs e cun cheste biele lenghe, che e je un don che o ai ricevût, che mi a dât confidence di esprimimi cun tante braùre, creativitât e passion.»
Cence dubi, o tornarìn a sinti a fevelâ di cheste artiste ecezionâl, che e à za imparât cualchi peraule di furlan e, come che e à dit, e je entusiaste dal fat che SUNS al sedi un festival che al celebri lis lenghis minoritariis. Spietant Dicembar par tornâ a cjatâle in Friûl, o podìn seguî Gwenno tai canâi in linie tant che Facebook e tal so sît web http://www.gwenno.info/
✒ Moira Pezzetta