Une campagne eletorâl pe indipendence e pe comunitât

Ivo Murgia al è un nestri amì che de Sardegne nus conte ce che al sucêt te isule. Al è ancje un scritôr e soredut un om che al lote pe indipendence sarde. Al jere candidât intune des trê listis dongje Michela Murgia e il progjet par une “Sardegne pussibile”. Ve ca il so articul su cemût che e je lade, un toc par fânus rifleti.
✒ Redazion
Chestis elezions sardis probabilmentri no varessin intiziât interès particolâr, ancje fûr de Isule, se nol fos stât pe candidature de scritore tant cognossude Michela Murgia e de sô coalizion. “Sardegne Pussibile”, chest il non, al cjape dentri trê listis, une indipendentiste “ProgReS”, e dôs civichis “Gentes” e “Comunidades”, di olme progressiste e che si vierzin ae societât civîl. I elements di novitât di cheste formazion a son tancj, e cualchidun dal dut inedits, no dome pe Sardegne. Intant e je la prime candidade femine de storie de Sardegne, che al è za impressionant, ma al è soredut il metodi de scolte partecipade la grande novitât. I OST (Open Space Technology), grups di lavôr tematics vuidâts e partecipâts, a àn consintût di butâ jù un program pensât e concepît dal bas, dai Sarts pai Sarts. La sô costruzion e smire a disfâ i grops de dipendence de Sardegne e a movisi invezit bande la “no dipendence”, disfrutant dutis lis pussibilitâts legjislativis disponibilis cumò. Il pinsîr politic di fonts al è clâr: ripuartâ i Sarts ae vuide dal lôr destin, fâju sintî il centri di lôr stes e no la perifarie di cualchidun altri, tornâ a cuistâ fiducie intes propriis capacitâts e intes risorsis straordenariis di une tiere biele e siore tal centri dal Mediterani. Une altre metodologjie inedite dal dut, e je stade chê di presentâ la “Zonte Pussibile” prime des elezions. A son stâts nomenâts e presentâts assessôrs competents e abii, candidantju a guviernâ assessorâts su la base de lôr professionalitât, al di fûr di logjichis di spartizion di podê. Un altri element di grant interès, al rivuarde la cualitât des candidaturis: a Michela Murgia e a “Sardegne Pussibile” ur va ricognossût il merit di vê savût cjapâ inteletuâi, artiscj e professioniscj di grant profîl, cognossûts in Sardegne pes lôr cualitâts umanis e professionâls. Di là de vision prospetiche di grant respîr, si son proponûts cun di plui tancj micro progjets di meti in vore intal periodi curt, par garantî une riprese costante e esponenziâl de economie e de societât sarde. Vignint a une note personâl, stant che jo stes o partecipi cun convinzion al progjet, jessint indipendentist e un operadôr culturâl prime ancjemò che un candidât, o vuei evidenziâ la impuartance particolâr che e rivistìs la culture inte elaborazion teoriche e politiche di Sardegne Pussibile. Nô o pensìn di fat che la nestre “Piçule rivoluzion”, e vedi soredut une grande fonde culturâl, intal sens che e partirà dal lavôr che nô Sarts o savarìn fâ dentri di nô, par formâsi e studiâ ma soredut par acuisî une fiducie gnove, chê che par masse timp e je mancjade, e che e je tra lis causis piês dai nestris mâi. Si è evidenziade cun di plui la centralitât de culture, tant che invistiment struturâl e de politiche linguistiche – robe che mi sta tant a cûr -, evidenziant la volontât di costruî une gnove fase di viertidure e pâs, e di cjatâ soluzions condividudis. Dâts ae man, Michela Murgia e racuei cuasi 76.000 vôts e si ateste tor dal 10%, deventant la tierce fuarce politiche de Sardegne. Un risultât costruît partint di zero dome in sîs mês, cence fâ aleancis cun partîts talians e contant dome su lis propriis risorsis finanziariis. Dome par vie di une leç eletorâl injuste e liberticide, che e blinde il palaç regjonâl impedint gnovis jentradis in consei, la coalizion Sardegne Pussibile no varà une rapresentance istituzionâl. A chescj dâts, al bisugne zontâ chel dramatic sul astensionisim, intor dal 50%, e la cussience dal lavôr fat e di chel ancjemò di fâ, un percors no facil ma necessari, e che in graciis de rêt di relazions costruide e il patrimoni di cognossincis  acuisidis nus puartarà dal sigûr tant lontan. ❚
Ivo Murgia