Un sbandât che al insegne

Il vanzeli di cheste ultime domenie di Otubar nus fas rifleti sul mût di compuartâsi di doi oms che a jerin lâts in glesie a preâ: il prin si stimave une persone daben e il secont al saveve di vêndi cumbinadis plui che Pitac. Un la tradizion lu à clamât fariseu e chel altri publican.
◆ Cuâl il motîf dal intervent di Jesù: par un pôcs di lôr che a jerin convints di jessi juscj e a spreseavin chei altris. Il prin, fariseu, al diseve: Diu, ti ai agrât parcè che no soi come chei altris oms, laris, triscj e nancje come chest publican culì. Jo o zuni dôs voltis par setemane e vie discorint.
◆ E je la tipiche mentalitât de persone che no à par fonde i valôrs de vite, la amicizie, la relazion gjenuine, la scletece, la umiltât e la cussience ma si sint di valê par vie dal ‘status symbol’ e dal so puest integrât te societât: o soi cualchidun parcè che la imagjin che o presenti tal vistî, te machine, te sielte dal ristorant e fâs gole e invidie ai vicins. Chest om / femine al adore la esterioritât, al cîr la aprovazion, si uniforme ae mode dal moment, al devente il spieli di chei altris. Al è jentrât te patologjie, te nevrosi de omologazion: un grant cori par jessi come o miôr di ducj. Al è il ritrat al contrari di Pier Paolo Pasolini che al diseve: “Tal presentâ lis mês opinions no ai nuie ce pierdi, nuie ce vuadagnâ e no ai pôre di cjatâmi rampit bessôl”. Chescj furlans / furlanis a àn pierdude la perle plui preziose: la anime, il spirt intim, origjinâl, gjenuin e unic di se stes. Di lôr, il Signôr al dîs: Ce i zovaraial po al om se, dopo vê cjapât il mont intîr, al ruvine la sô vite? O ben, ce podaraial dâ l’om sore de sô vite? (Mt 16, 26).
◆ O lassi in lenghe taliane un pinsîr che o ai cjatât in F. Dostoevskij, muart tal lontan 1881: “Un giorno l’idea di uguaglianza sarà così diffusa che non si potranno dire cose intelligenti per non offendere gli stupidi”.
◆ Cjalìn cumò al publican. Di chest om, forsit cjamât di monede, bisugnarà domandâsi cemût mai che al è finît in glesie a batisi il pet e a dî: te vite o ai sbaliât dut.
◆ Ce i jerial capitât: forsit une mosse falade, un colp di cjâf, une brute compagnie, une ingjenuitât, un imbroi di malvivents che, dopo depredât, ti bandonin mieç muart sul ôr de strade. In chescj câs, sta sigûr che di là di cuatri cjacaris, ducj ti bandonin e no tu cjatarâs compassion. Intant la tô disgracie e deventarà articul di gjornâl, tu sês invidât a fâ spetacul, a svuedâ il sac in place, magari par television, discrotâti in public, contâ cence pudôr ce che di intim al è tal cûr.
◆ Chel che al patìs pardabon e al à dignitât, al sa che lis cjacaris dai social e dai peteçs no son a to pro; al preferìs stâ in cjase, confidâsi cuntun amì se lu à o sentâsi intun banc tal cidin di une glesie. Cuant che no sarà ni cjase, ni amîs, ni Signôr e restarà la ultime decision in aument fra adolessents e anzians, fûr e dentri des presons: il suicidi, fat che al acuse cence remission la nestre societât.
◆ Duncje il publican al è in glesie a domandâ jutori par vie che nol sa cemût parâsi. Il troi di fâ, in gjenar al è chest: o ai di acetâ la veretât ancje amare di ce che al è sucedût; forsit o ai di passâ traviers la umiliazion e la vergogne di vê dade une imagjin di me che no esisteve; forsit la int e veve crodût in me e cumò e je deludude e rivoltade; o ai tocjât il font de esperience umane: o ai scuviert che te vite ogni tant a ducj dut ur cole e mi salvaran sinceritât, veretât, ricevi e donâ afiet. Cheste e sarà la mê vite di cumò indevant. In dut: il Signôr al capìs, no mi bandonarà.
◆ In chel moment precîs il publican, il sbandât, al ven parturît, al nas a vite gnove: liberât di mil gredeis che lu peavin al è deventât om / femine, se stes. La sô dignitât no je plui tal ‘status symbol’, ma te relazion umane, sincire cun ducj; no i interesse ce che il prossim al vedi robe ma al cjale cuntun voli uman la umanitât vive o distudade di ognidun.
◆ Primo Levi tal so libri “Se questo è un uomo” scrit tal 1976, domandantsi cemût che al veve fat a restâ vîf tal lager di Monowitz, comprensori di Auschwitz, al segne: “Forse ha giocato infine anche la volontà, che ho tenacemente conservata, di riconoscere sempre, anche nei giorni più scuri, nei miei compagni e in me stesso, degli uomini e non delle cose, e di sottrarmi così a quella totale umiliazione e demoralizzazione che conduceva molti al naufragio spirituale”. E je la diference fra il fariseu e il publican: il prin si stimave pes robis che al veve e che al faseve il secont acetant se stes, la proprie umanitât fragjile.
◆ l pinsîr di Primo Levi al è clâr: “riconoscere sempre, anche nei giorni più scuri, nei miei compagni e in me stesso, degli uomini e non delle cose”.
Il vanzeli di vuê al siere: “Us dîs che chest culì al tornà a cjase resurît, chel altri invezit no”.
◆ Ducj cuancj o savìn che la Europe e sta passant un grant travai parcè che di regjine dal mont come che e podeve sintîsi al inizi dal secul passât si sta ridusint a une provincie al confin dal imperi. Dutis lis sôs bielecis a son vuê metudis in discussion: la sô filosofie, culture, religjon, politiche, dirit, la Union Europeane, la democrazie stesse e la pâs vuadagnadis cul sanc de ultime vuere mondiâl. O la Europe e torne a cjatâ une sô anime o e je destinade ae perifarie de societât che e vignarà. Ce che o dîs de Europe al vâl ancjemò di plui pal nestri Friûl: destinâts ancje nô a cjatâ une identitât o a jessi nissun. Il publican dal vanzeli si è salvât tornant a cjatâ se stes, la sô uniche origjinâl umanitât.
Doi oms a lerin sù tal templi. Il sbandât al tornà cjase om, persone umane. ❚