Un puest «che nancje in Australie»: il Friûl di Ruth Borgobello regjiste australo furlane vignude a fâ cine achì

O sin intune fabriche di Osôf. Telecjamaris forestis a seguissin la vite di Marco (l’atôr Flavio Parenti), che al lavore chi dentri, e di Olivia (la atore Maeve Dermody), la sô morose. Forsit ju vês viodûts in chestis ultimis sîs setemanis vie par Udin, Cividât o Gurize. A son la troupe dal film “The Space Between”, opare prime de regjiste italo australiane Ruth Borgobello e dal om e co produtôr di Gurize Davide Giusto. E je la prime produzion italo australiane di simpri, realizade di Mondo Studio Film, Idea Cinema di Rome e Fantastificio di Triest, e finanziade di bande dal Ministeri talian dai Bens Culturâi, di Film Comission Friûl-Vignesie Julie e di invistidôrs privâts australians. E zirade dute chi di nô.
DOMANDE
Cemût mai propit il Friûl, lu vin domandât ae regjiste, che e je nassude a Melbourne tal 1976: «O ai simpri pensât di zirâ il gno prin film te tiere di origjin de mê famee. A son vot agns che o lavorìn a chest progjet. O savevi che vignî fin achì al sarès stât plui dificil, ma no ai mai vût dubis: chest al jere il so puest, l’istint mi diseve cussì». Ruth e je simpri stade a stâ in Australie, ma chi e vignive dispès in visite (intun di chescj viaçs, 16 agns indaûr, e à ancje cognossût il so om). Il pari Maurizio, di Gurize, al è emigrât in Australie cui siei a cirî fortune co che al jere canai, al veve 7 agns. Il pari, il nono di Ruth, al jere prime mecanic e po dopo ferovîr, e la none sartore, ducj i doi origjinaris di Basandiele. E la gnece vele chi vuê, tierce gjenerazion tornade a cjase intun viaç al contrari, back to the roots.
LIS CONTIS DE NONE
«Par tancj agns il Friûl lu ai cognossût soredut in gracie des contis di mê none» e dîs «o ai cjacarât cun jê par oris, e le ai ancje regjistrade: i siei ricuarts a jerin leâts ae vuere, ae miserie, aes dificoltâts. Di chê altre bande o vevi i ricuarts di gno pari: par lui il Friûl a jerin i zûcs in campagne, il mangjâ, la lûs. E par me, mi soi domandade, ce jerial il Friûl?». E alore cumò, a ripresis finidis, ce isal il Friûl par jê? «O ai cjatât une tiere di une bielece platade, plene di contrascj» e sclarìs «chi a son il mâr, la mont, la campagne, dut dongje: impensabil in Australie, là che dut al è lontan. Lis citâts a son diferentis une di chê altre, ogni paîs al è une sorprese. E po la lûs, la architeture, i paisaçs: i lûcs a son cetant interessants dal pont di viste cinematografic par un regjist. O ai la impression che i furlans che a vivin chi no si inacuarzin ben di dute cheste ricjece. A son puescj che forsit nancje lôr a cognossin… Mi ven iniment la Badie di Rosacis… Oh wow, fantastic! Il Friûl nol a nuie di invidiâ ae Toscane».
CARATAR FURLAN
Di furlan tal film al è ancje il caratar di cualchi personaç, come chel dal pari dal protagonist, un om risiervât e braurôs: «O ai cirût di contâ il rapuart jenfri pari e fi, cun dutis lis dificoltâts di esprimi i sintiments, di fâ viodi l’afiet» e conte «come che ai viodût jenfri gno pari e gno nono». Par Ruth, che e à studiât al Victorian College of the Arts in Australie, e che cui siei lavôrs e à za ricevût ricognossiments impuartants, e je stade la prime volte lavorative chenti. Cemût ise lade? «Chi o ai cjatât un grum di int creative, di grant talent» e rispuint «e no dome: chi e je la pussibilitât di lavorâ ben, che nancje a Rome. Al è dut a puartade di man, zirâ al è plui facil, la int e colabore e ti jude, ti invide a cjase sô. Tal fin setemane po si pues lâ ator, magari a Duìn, si vîf e si lavore ben, che ducj i romans a vuelin tornâ a lavorâ in Friûl! E si mangjie ben: i australians a lavin mats pal frico!». Il film al vignarà fûr dentri dal 2016: «O organizarìn un biel event a Udin» e dîs «o speri di presentâ ai furlans un film che al cjacare di un Friûl vêr, autentic. Chel stes Friûl che al è l’unic puest là che mi sedi mai sintude a cjase, che nancje in Australie». ❚
Natascia Gargano