La Adunade dai alpins che si fâs ogni an, intal 2019 e je stade a Milan dai 10 ai 12 di Mai. E no je adunade cence alpins furlans, che, però, a vevin bisugne di un cjamp base. A metilu sù al è stât Gunnar Cautero, titulâr dal ristorant furlan “Osteria della Stazione – l’Originale di Milano”. Gunnar, ex alpin, al è origjinari di Udin e al à rilevade une aree di sù par jù 700 metris cuadrâts, dongje de stazion centrâl, dulà montâ lis tendis e ancje cuntun spazi par ospitâ i mus. Vie pai 3 dîs de manifestazion, e je stade ancje une base di fieste e di riferiment par dut il cuartîr tirât dentri te fieste. In sumis, Gunnar al à tignût fede al so slogan di jessi il “Consolât furlan a Milan”. Nassût a Udin al è fi dal gjornalist Gianfranco Cautero, par chel al è lât a stâ a Milan di cuant che al veve 4 agns. «Ma o soi simpri stât leât al Friûl: vacancis, nonos e il mangjâ e bevi». Di zovin al è stât semi professionist di football american e di conseguence rapresentant di articui sportîfs. Dopo al è passât a gjestî ristorants e albiercs e si è metût in propri cul ristorant “Oste del Teatro” tal cuartîr Isola. Cumò al gjestìs la “Osteria della Stazione”, caraterizade di ristorant furlan. «Ancje prime o dopravi prodots furlans, ma cumò o propon la nestre cusine, cuntun contat costant cun furnidôrs furlans. E no dome». Sì, parcè che Gunnar si definìs “Consolât” parcè che no je furlane dome la cusine, ma tantis altris iniziativis che al invie. Par esempli, di pôc al à in sale un “taulin di sglovaç”, fat cul len di arbui vignûts jù tal disastri fat in Cjargne dai burlaçs di chest Invier. «O pensi di sostituî ducj i taulins metint chescj, viodarìn». Gunnar al è soci sostignidôr dal Fogolâr Furlan di Milan e si fâs li di lui il gustâ di Nadâl dal Fogolâr la dì prime de Messe par furlan in Domo. Uniche “pecje”, nol fevele la marilenghe, ma al siere l’elenc di dutis lis sôs iniziativis disintmi: «Ah, Dree! E cumò o stoi cjapant lezions di furlan!».❚
Dree Venier
