TV FRIÛL E CJANÇONS. La isule dai furlans

Une isule, vincj concorints plui o mancul famôs, tre mês e plui passâts a cirî di sorevivi ancje tes piês condizions: un dai reality show plui di sucès de storie de television al rive ancje chi di noaltris. E sta par scomençâ “La isule dai furlans”!
Come ducj i reality, ancje “La isule” e covente par fâ cjatâ une ocupazion a ducj chei VIPs che no àn plui nuie ce fâ. Il spetacul al scomençarà duncje ae fin dal campionât di balon e i concorints a saran ducj i presentadôrs e i ospits des trasmissions che a fevelin da la Udinese, scomençant di Petiziol par finîle cun Sdrindule.
A diference de edizion nazionâl, “La isule” no je ambientade in Honduras o in cualchi puest spierdût lontan di dut, parcè che i furlans e son stracs di migrâ. La location e sarà la isule di Barbane, cussì invezit di spindi bêçs par traspuartâ i concorints cul elicotar, si pues doprâ diretementri la motonâf Saturno dal cjapitani Geremia.
Une volte rivâts parsore da la isule, i concorints a varan di metisi a lavorâ par sorevivi: tirâ sù un puest dulà stâ, cjatâ alc di meti sot dai dincj, piâ il fûc. Dut come te edizion origjinâl, o disarês voaltris. Sì, ma cuntune difarence: che par un furlan chê li no je une pinitince, ma un premi. “Fâsi un ripâr di bessôl” al è il massim dal gjoldiment pai nestris concorints che a puedin cussì sfogâ i lôr doi plui grancj istints: “fâ sù une cjase” e “rangjâsi”.
E par mangjâ, nissun probleme: i prins dîs i “naufragâts” a cjapin sù urtiçons e grisulons, e intant a preparin l’ort: tal zîr di dôs setemanis a varan cressude tante di chê verdure che a podaran ancje lâ a vendile ai fraris dal santuari.
E ae fin di ogni setemane, a Barbane come in Honduras, al rive il moment des nominations. Pe trasmission nazionâl al è un dai moments plui spietâts, dulà che a vegnin fûr lis miôr sorpresis, ma a Barbane lis robis no van cussì. Il furlan al è modest, al cjale simpri i siei erôrs prime di vosâ a di chei altris, cussì ta la “Isule dai furlans” ducj i concorints si nomenin di bessôi.
Dopo lis votazions dal public (fatis par alçade di man: un furlan nol spint bêçs par telefonâ a une trasmission), ogni setemane un concorint al va fûr de isule, ma no ancjemò fûr dal program: e je simpri une “ultime splaze”, nome un tic difarente di chê de trasmission taliane. Invezit di un puest isolât, dulà che il concorint al à di fâ dut di bessôl cence fevelâ cun nissun, i eliminâts a van une setemane a Barcola, cercenâts di cjacaris e di triestins. Us vegnie indiment une punizion piês di cheste?  ■
BETE DI SPERE