La Universitât dal Friûl e je simpri plui rose.
Ma la strade e je ancjemò lungje
A fasin ben sperâ i dâts publicâts intal belanç di gjenar di chest an (dâts leâts al 2021) dal Ateneu di Udin, li che si lei che lis feminis a son daûr a cjapâ simpri plui fuarce, come studentis ma soredut tant che ricercjadoris e docentis, o tant che figuris aministrativis.
◆ Une cressite in linie cul rest des Universitâts talianis, li che lis matricolis feminis a son plui de metât (53,1% a Udin), cun risultâts dispès une vore miôr a pet dai fantats, aben che a sedin ancjemò cors paronâts de presince masculine, tant che chei des materiis “STEM” (Siencis fisichis, tecnologjie, inzegnarie e matematiche), ven a stâi Tecnologjie de informazion e de comunicazion (dome il 18,7 % di feminis inte lauree trienâl di Udin) e Inzegnarie, ativitâts manifaturieris e costruzion (li che si rive al 22,4% te lauree trienâl). Par cuintri, se si va a viodi il setôr de Istruzion, lis fantatis a paronin, cuntune presince dal 93%.
◆ Ancje la ricercje e à viodude une incressite dal numar di feminis, stant che la percentuâl e je passade intun an dal 16,7% (2020) al 26,7% (2021). Clare che in dut chest bisugnarès ancje viodi lis cundizions di contrat, ma cheste e je une altre mignestre. Cence lâ a fâ i conts tes sachetis de int, si pues dut câs lâ a viodi lis statistichis europeanis (dâts Eurostat pal 2021), li che la Italie e fâs di codarûl inte liste dai Stâts par chel che al inten il numar di ricercjadôrs in proporzion ai abitants. Noaltris o sin al cuartultin puest (99 ricercjadôrs su 100.000 abitants, cuintri de medie europeane di 143), denant di Cipri (85), Bulgarie (48) e Romanie (31,6). In Danimarcje, invezit, la medie e je di 300 ricercjadôrs su 100.000 abitants, li che dut câs lis feminis a son chês plui sotpaiadis o cun contrats plui balarins rispiet ai oms (il 15% des feminis intervistadis e declare di jessi precarie, cuintri dal 6% dai oms). In Lussemburc, par dînt une, dome il 0,4% des ricercjadoris e declare di jessi precarie, cuintri il 2,6% dai ricercjadôrs.
◆ Se o lin a viodi lis catidris, a Udin lis feminis a son il 25,1% dai professôrs ordenaris, il 35% dai professôrs associâts, il 40% dai ricercjadôrs a timp indeterminât, il 47% dai assegniscj di ricercje, par une medie dal 37% dal organic di docents e ricercjadôrs, che e je dut câs plui basse a pet des mediis talianis.
◆ Ancje i rûi strategjics a somein jessi simpri plui rose, cuntune cuote di delegadis di setôr dal 29,4% (cuintri i 20% dal 2020), cul 37% di diretoris di dipartiment (massime intes materiis umanistichis) che al puarte a ecuilibrâ il Senât academic cuntune presince feminine al 44,4%. Une vore di plui ancje lis impleadis (66,8%), ancje cun rûi decisionâi impuartants. Stant al valôr di “glass ceiling” (sofit di cristal), di fat, la probabilitât che une femine e rivedi “te spice” e je dal 1,35, une vore dongje de avualance e miôr rispiet al dât talian (1,49).
◆ Pecjât che di chest scandai no salti fûr ancje la diference intal tratament economic, stant che daûr de medie OCSE (Organizazion pe cooperazion e pal disvilup economic), a paritât di contrat, lis laureadis a cjapin in medie dome il 77% di ce che a vuadagnin i coleghis oms. In Italie, la percentuâl si sbasse ancjemò fin al 70%. Alc di miôr lu fasin Spagne (84%), Slovenie (85%) e Belgjiche (87%). Dât di ecezion chel de Coste Riche, li che lis paiis par une laureade a son plui altis di chês dai laureâts (101%).
◆ Cheste, forsit, e podarès jessi une idee di meti dentri tal prossim belanç di gjenar dal Ateneu. Cuntune consolazion: se a vessin di voltâlu par furlan, si sparagnaressin tancj di chei asteriscuts. Te nestre lenghe, par fortune, la inclusion e la paritât di gjenar no si misurin cui simbuluts, ma cu lis justis peraulis declinadis par lui e ancje par jê. ❚
