✽✽ Si cjatarìn ancje chest an ai 13 di Lui a Aquilee par celebrâ l’Avôt dal Friûl. Al è un moment impuartant, un avigniment di caratar religjôs, un at di fede che si fâs in chê basiliche che e je stade la fonde dal prin cristianisim là che o vin di apelâsi e fâ riferiment, se o volìn lâ fûr di chel pantan che nus cengle vuê.
✽✽ No stait a pensâ che il riclam a chestis lidrîs al sedi une cuistion che e tocji dome cui che al crôt. Al contrari: al tocje ducj e dutis, parcè che i valôrs che nus vegnin trasmetûts a àn un caratar universâl tant che chei che propit la Glesie di Aquilee e à lassât. Inte confusion di cumò, intun mont là che al somee che si sedin dismenteâts i orôrs des vueris, il stermini dai inocents tant che pratiche acuiside, il domini dai potents sui debii de tiere, cjatâ fûr une vision dal mont che si ispiri ae pâs, ae justizie, ae libertât, al pâr simpri plui tant che un sium impussibil.
✽✽ Il messaç che al rive di Aquilee al reste duncje une vôs di sperance, une lûs che no mole di slusicâ. Nus invide a jessi siei fîs ancje in chês scuretâts che a parin involuçâ dute la umanitât.
✽✽ Isal un at di matetât, di demence senîl o forsit di presunzion sintîsi piçulis flamis in chest dissen de Providence, clamâts a jessi messazîrs di un mont diviers?
✽✽ E je une domande legjitime: parcè propit nô furlans varessino di jessi stâts sielts par cheste mission? E sino forsit cussients di chest? Il materialist al rispuindarès daurman che a son stadis lis cundizions storichis, gjeografichis e politichis a determinâ il creâsi di une comunitât cristiane a Aquilee. Il stes pinsîr al cjatarès dome tant che ipotesis sugjestivis lis sôs origjins alessandrinis, la rivade dal evangjelist Marc tant che une liende. La teologjie patriarcjine contrarie a chê de Glesie romane? Une des tantis cuistions tal mieç di secui di eresiis.
✽✽ Epûr alc nol torne, se ancjemò une volte si cjatarìn vuê a Aquilee clamâts dongje dai predis di Glesie Furlane. Se chest apontament nol nassès di une idee profetiche di pre Checo Placerean, che al viodeve la rinassite dal Friûl dome basantsi su chei valôrs antîcs, forsit o varessin di fâsi une reson, acetâ che cheste, plui che une sfide, e je un at di amôr bande la nestre int.
✽✽ E puedial mai un at di amôr dimostrâsi un fatôr negatîf? ❚
