TERITORIS – OMS DI LIBERTÂT. Pasquale Paoli, il pari de prime costituzion moderne (Corsiche)

Pôcs a san che la prime Costituzion moderne no je chê dai Stâts Unîts, ma chê corse dal 1755. Chest nol sarès stât pussibil cence di Pasquale Paoli (1725 – 1807). Cun di fat, Paoli nol è stât dome un patriote cors, ma ancje il prin cjâf di stât de Corsiche indipendente, un comandant militâr, un riformadôr e un democratic che al à savût ispirâ cu la sô azion cetancj di lôr ancje fûr de sô isule (tant che i «Sons of Liberty» americans in lote cuintri dal dispotisim britanic).
Tornât dal esili intal 1755, il «babbu di a Patria» al ven nomenât gjenerâl de nazion corse e in pôcs mês al libere cuasi dute la isule dai gjenovês. Al è sot de sô vuide che la Corsiche si proclame Republiche indipendente e si mude intune democrazie rapresentative. Tai agns dal so guvier Paoli al riforme il sisteme de justizie e chel scolastic, al sburte la modernizazion de economie e al fonde une universitât a Corti.
Cuant che Gjenue e vent la isule ai francês, Paoli al vuide cun sucès la resistence, ma intal 1769 al ven batût inte bataie di Ponte Novu e al à di lâ in esili a Londre. Dopo de rivoluzion francese, intal 1790, Paoli al torne in Corsiche di trionfadôr. Tal 1793 l’esecutîf francês lu declare traditôr, ma la assemblee corse e proclame la separazion de isule de France e lu nomene president. Par difindisi dai francês la isule e devente un protetorât britanic: Paoli però nol è facil di controlâ e tal 1795 al ven obleât a tornâ a Londre intant che la Corsiche e cole intes mans de France.
CARLI PUP