TERITORIS – OMS DI LIBERTÂT. Leonard Peltier e la lote mai finide des primis nazions (Ojibwe)

Leonard Peltier e la lote mai finide des primis nazions (Ojibwe)
Par solit, cuant che o pensìn ae lote dai popui natîfs americans par difindi la lôr tiere e la lôr libertât, nus vegnin intal cjâf nons leâts a timps e lûcs avonde limitâts. Cun di fat libris, fumuts e films nus àn fevelât soredut de resistence dai popui des grandis planuris e dal Sud Ovest dai Stâts Unîts vie pal 1800. Par chel si visìn di Thathánka Íyotake (Sitting Bull), Mahpíya Lúta (Red Cloud) e Thašúnke Witkó (Crazy Horse), ducj i trê lakotas (sioux), o dal apache chiricahua Goyaałé (Geronimo).
La lote des “primis nazions” però e cjape dentri dut il continent e e va indenant ancje in dì di vuê. Baste pensâ che i “zapatiscj” dal Chiapas a son pe plui part mayas, e che il sucès plui grues intal procès di autodeterminazion di un popul natîf al è rivât intal 1999 cu la nassite dal Nunavut: passe 337 mil chilometris cuadrâts di teritori canadês là che cumò a guviernin i inuit.
Si à alore di ricuardâ che cheste lote pe libertât e pai dirits dai natîfs americans e à tornât a cjapâ fuarce ancje intai Stâts Unîts za a partî dai agns ’60. Al è un om che plui di ducj al è deventât il simbul di cheste lote: Leonard Peltier. Militant dal American Indian Movement, di nazionalitât ojibwe, Peltier al è stât condanât ae preson a vite dopo di un procès farse cu la acuse di vê copât doi agjents dal FBI tal ’75 intun scuintri a fûc inte risierve di Pine Ridge. La sô presonie e mostre che tai Stâts Unîts la “cuistion indiane” no je sierade e e spiete inmò justizie.
CARLI PUP