TERITORI – AUSTRIE. Plui di 30 agns di ativitât teatrâl permanente in lenghe di minorance

In Carinzie si inmanein ancje festivai internazionâi dal teatri dai pipinots_ Fin al 1938, prin che a rivassin i naziscj, Viene e fo un centri culturâl de vite judaiche dal imperi austriac. La lenghe Yiddish si fevelave soredut a Soreli Jevât dal vieri imperi, ma ancje a Viene. Il teatri plui innomenât che al veve un grant sucès ancje al dì là dai confins al fo il «Freie Iüdische Volksbühne», vâl a dî il teatri popolâr e libar judaic (1919-1923). Al fo un dai pôcs lûcs dulà che si podeve viodi rapresentazions in lenghe Yiddish e tocs di chê stesse  leterature. Cui naziscj e scomparì ancje la culture judaiche di Viene; a son restadis però fin vuê un grum di peraulis e frasis te lenghe vienese che a divegnin dal Yiddish o dal ebraic. Par esempli, il todesc vienês Hawara («amì») al ven dal ebraic «chaver» («amì»).  In chest an si celebre il diesim cjadalan dal gnûf teatri judaic in Austrie che al cîr di dismovi la tradizion teatrâl judaiche. Oltri a chest, dal 1994 si organize regolarmentri a Viene la setemane dal teatri in lenghe Yiddish.
La vite teatrâl di minorance si davuelç dome sul plan locâl, cussì o cjatìn tal Burgenland, scuasit in ogni paîs, grups amatoriâi cun rapresentazions in lenghe cravuate. Tal 1995 al fo impastanât il Bécsi Magyar Színház (il teatri ongjarês a Viene), dulà che la minorance ongjarese e presente spetacui 2-3 voltis ad an.
La plui ative e je la minorance slovene_ La aleance cristiane culturâl – Kršcanska kulturna zveza (KKZ) – e je une des organizazions culturâls dai slovens plui impuartantis in Carinzie: za di plui di 30 agns si inmanein ancje ativitâts di teatri dai zovins, soredut il teatri dai pipinots (sloven: lutkarstvo). Chest gjenar di teatri al vignì plantât tal 1974 ancje in Carinzie cul jutori dal teatri dai pipinots di Maribor. In chê volte a tacarin cun dome un grup, e cui agns la ativitât teatrâl e je cressude une vore, cussì o vin vuê une produzion siorone intes associazions culturâls slovenis. In plui di 30 agns di ativitât teatrâl permanente, a àn partecipât plui di 1000 atôrs, e presentadis plui di 200 anteprimis; lis rapresentazion a nassevin cul jutori di plui di 400 specialiscj. La gran part dai regjiscj e ven ancjemò vuê de Slovenie, però intai ultins timp i carinzians a son rivâts adore ancje a sigurâ un numar di specialiscj di cjase.
JANEZ ERAT