La trilogjie dal teatri furlan e je lade in sene tal Teatri Gnûf Giovanni Da Udine in colaborazion cul Teatri Stabil Furlan
Une esperience rivade ae seconde edizion ma simpri tant origjinâl di someâ une prime. La idee dal scritôr e dramaturc Paolo Patui di fâ cognossi oparis impuartantis de leterature teatrâl furlane – fasintlis rivivi sul palc cun azions senichis diretis, interpretadis di atôrs furlans zovins e brâfs – e funzione cetant ben.
◆ E je la ereditât dal teatri furlan che si crodeve di no vê e che invezit si mostre in dute la sô lûs, graciis apont al progjet “Trame Ricucite/Tramis pontadis”. Une serie di trê apontaments realizâts tal mês di Novembar a pene passât, produsûts dal Teatri Gnûf Giovanni Da Udine e dal Teatri Stabil Furlan (Tsf) insiemi, par cure di Paolo Sartori, cu lis sieltis musicâls di Daniele D’Arrigo, la ideazion di Paolo Patui e la presince di un grup vivarôs di atôrs che a àn impersonât diviers personaçs: Caterina Bernardi, Manuel Buttus, Caterina Comingio, Carlotta Del Bianco, Alessandro Maione, Paolo Mutti, Gianni Nistri, Marta Riservato e Massimo Somaglino, diretôr artistic dal Tsf.
◆ «Cun cheste seconde esperience o sin simpri plui convints, e cun nô ancje il public, che e covente une azion divulgative di cheste intal nestri teatri di repertori, dut di riscuvierzi», nus conte Paolo Patui.
_ Par fâ un rindicont di ce che al è stât, i vin domandât intant il parcè de sielte dai trê tescj in cuistion. «“Tra parincj” al è un test dal 1892 di Luigi (Luîs) Merlo, forsit il so miôr. E je une comedie che e somee lizere ma che e je plene di messaçs liberâi e anticlericâi, une vore gustose. “In Gjermanie!” al è invezit un test di Giuseppe Edgardo Lazzarini dal 1980, dramatic, di grande potence, che al fronte un argoment sociâl tra i plui dûrs dal Friûl di fin Votcent: l’esodi. Infin, “Presons” di Alberto Luchini, dal 2006, al è un lavôr cetant atuâl, ironic, discjantât, che al conte di trê feminis, tra finzion, destin e sintiment. Trê oparis diviersis, che a doprin un furlan ognidun diferent, a valôr de ricjece des nestris variantis». _
A son “rapresentazions” de nestre storie furlane plenis di significâts, che nus rindin cussients di cetant che o vin inmò di cognossi e di imparâ de nestre leterature pal teatri.
E il public, cemût aial reagjît a chestis propuestis?
«O sin stâts cetant contents de rispueste. In timps tant dificii, par propuestis in ogni mût di “nicje” – sperant che il furlan lu fevelin e lu scoltin simpri plui personis – la presince de int in teatri e je stade numerose, une biele partecipazion, grande atenzion, ridadis e moments di riflession».
_ Une altre novitât e je dade dal fat – robe mai sucedude prime chi in Friûl – che tu Paolo, in plui di introdusi lis seradis cun notis critichis su lis oparis, par calâ il scoltadôr te comprension di ce che si viodarà e si scoltarà, tu sês intervignût in cierts moments resonant a sene vierte, intant che i atôrs a recitavin un “alc” di particolâr. Tant di fermâle, la sene, come fasint “stop” cul telecomant, par contâ di detais e di altris robis che a meretin di jessi ditis. Cemût ise lade? «Propit cussì. In cierts moments o soi jentrât in sene par contâ il parcè di cualchi situazion che si presentave. O amet che sul imprin no jeri trop convint di chestis mossis. O pensavi di disturbâ la concentrazion dai atôrs. Invezit, come che mi àn dit ancje lôr, chestis notis che o devi ur son stadis utilis ancje a lôr, che in maniere performative, sul moment, si son plasmâts cun grande competence aes sugjestions che o invidavi a rivivi. Une sorte di vuide, e ancje il public al à preseade la formule, rivant cussì a calâsi dal dut intes storiis e intes lôr evoluzions». _
Duncje il teatri al va ancje spiegât, no dome mostrât. Soredut se si è daûr a presentâ un patrimoni che la plui part de int no cognòs. E dai zovins atôrs, che cun entusiasim e competence ti àn stât daûr in cheste aventure, ce pensistu?
«Chest al è il secont grant teme di frontâ. Meti sul palc atôrs cetant brâfs, che a son la linfe gnove dal teatri furlan, e je une azion necessarie che o vin la fortune di podê fâ, graciis a lôr e ae lôr bravure. Un agrât speciâl ancje a Paolo Sartori che al à rivât in pôc timp a vistî lis trê oparis in maniere otime, e aes sieltis musicâls di Daniele D’Arrigo, simpri induvinadis. Dut chest cun dôs grandis realtâts insiemi: il Teatri Gnûf Giovanni Da Udine e il Teatri Stabil Furlan, che nus àn dade dute la disponibilitât e la presince. O sin onorâts».
__
Tu sês simpri in atîf cun tancj progjets. Tu âs di pôc publicât pe Librarie Editore Odòs “Carnia. Una guida” che e sta lant benonon. E daspò?
«In merit al teatri, o varessin gust di fâ zirâ “Tramis Pontadis” ator pal Friûl, di mût di pandi al miôr la fuarce dal teatri furlan. La vuide su la Cjargne, tiere che o ami une vore, e sta lant ben e o vin diviersis presentazions; cun di plui o stoi metint sù leturis publichis cun Bottega Errante sui doi libris “Scusate la polvere” e “Alfabeto friulano delle rimozioni”, par fâ cognossi personalitâts incredibilis ma ancje purtrop dismenteadis dal nestri Friûl». ❚
