«Salvât il lât, ce fasìno cun lui?». Se la prioritât e je chê di inviâ un procès che al permeti al Lât di Cjavaç di tornâ a vê la sô naturalece, di chê altre bande al è clâr che chê Valade e varà di seguî une prospetive turistiche par sfrutâ ben lis cualitâts di chel teritori cence che si torni a tocjâ il so ambient. E je di fâ inmò un pocje di strade, dut câs a son tantis robis che te Val dal Lâc a van za in chê direzion. Sul Lât a son vuê operatîfs doi campings dulà che ogni an a rivin personis sedi de Italie come pûr de Austrie e de Gjermanie, e fintremai de Olande. Tancj ancje cu la biciclete, rivant de ciclovie Alpe Adria. A pocje distance dai campings su la rive Ovest, l’imprenditôr Polo di Ravasclêt al à cjapât in man l’albierc “Al Lago”, che al jere sierât di agns, e che cumò si sta ristruturant cun tant di zardin esterni su la rive dal bacin, e in curt al tornarà a jessi viert.
Se cheste e je la ricetivitât presinte, sul front sportîf o ricuardìn che di timp inte Val e je ative “Nautilago”, societât sportive che e pratiche la vele: dongje dal vê une scuele, e inmanee regatis te stagjon estive. Su la rive Ovest si cjate ancje la piste di rivade a tiere pal svol acrobatic: za di agns, la associazion “Volo Libero Friuli” e inmanee sul Lât di Cjavaç “Acromax”, gare internazionâl di svol acrobatic li che a partecipin pilotis di parecleve di dut il mont. Si son fats ancje i mondiâi di cheste dissipline, ma ogni an a rivin di lontan a partecipâ par vie che e je un tape di Cope dal mont ricognossude a nivel internazionâl.
Lis tantis personis che a frecuentin la Val dal Lâc tal periodi estîf a àn podût preseâ cui lôr voi lis maraveis in svol dai atletis che si butin de Mont di Sant Simeon, sore Bordan. Come che a àn podût scuvierzi altris lûcs naturâi pal Istât sul vicin torint Palâr a Dalès, e tancj che a vegnin pe preseade fieste des Cerniculis a Vasinis. In sumis, a son za tantis lis robis che si fasin tun teritori une vore preseât par vie che, viodudis lis infrastruturis che lu traviersin, al è ancjemò vert e sugjestîf.
Tai ultins agns, il Comun di Trasaghis al à inviât il progjet “Immergiti nel Lago”, par svilupâ chê part dal so teritori e par dâi une prospetive ricetive e turistiche. Il prin pas al è la realizazion di un gnûf cjamp di balon cun tribunis e locâi multiservizis che la Aministrazion e inviarà tai prossims mês par un invistiment di passe 700 mil euros. Ancje chê struture e larà a completâ i servizis su la spuinde Ovest. Su di chê altre spuinde e je la storiche discoteche “Al Lago”. In sumis, iniziativis e struturis no mancjin par dâi un futûr al Lât di Cjavaç, e une strade divierse rispiet al sfrutament indiscriminât des bielecis naturâls e dal paisaç, si pues simpri percori. ❚
Piero Cargnelutti