TAL ETERE. Cjastrons, ma cun inteligjence

Il percors viers la vitorie a “Joy! Ce biele zoventût” (il concors di Radio Onde Furlane e ARLeF par cjatâ gnovis vôs e ideis in marilenghe) al è scomençât cuntun scjatulon di carton, lassât li de Universitât dal Friûl. Sfueiuts cun trê domandis consegnâts ai students, che a rispuindevin par iscrit, imbusant la rispueste. Leintju e comentantju par radio, si è indreçât il sucès dai “Cjastrons”. Cussì si clamave il program par partecipâ al contest di ROF, cussì cumò lôr stes a vegnin clamâts.
I Cjastrons a son trê zovins – etât juste a pene parsore dai vincj agns: Cristian Pressacco di Flaiban, David Benvenuto di Bicinins e Marco Floran di Colorêt di Montalban. A àn vinçût la pussibilitât di puartâ il lôr format sui Mhz di Onde furlane, firmant un contrat di colaborazion. Il lôr program al partirà chest Autun, stesse formule vincente, stesse comicitât iriverente; ancjemò di definî la date precise de prime pontade e l’orari di trasmission. Si sa che al sarà une volte par setemane e che al durarà une ore. Une cerce dai trê personaçs al microfon si pues però za scoltâle sul web, li de plateforme Soundcloud che e à ospitât i contignûts e i programs dal concors. Juste par fâsi une idee di ce che nus spiete.
I trê cjastrons a tornaran ancjemò al assalt dai furlans, cun intervistis cjapadis sù par “strade”, interazion traviers dai scoltadôrs, doprant ancje la lôr pagjine facebook. «O volìn puartâ il gjenar dal intrateniment plui dongje ai zovins. Il nestri program al è par ducj, clâr, ma o cjalìn cuntun voli speciâl propit a cheste fasse di scoltadôrs», al spieghe David Benvenuto. «O doprìn lis intervistis par scandaiâ e proponi dutis lis formis pussibilis de comicitât, de satire e de ironie».
Gavete in parochie, tant che animadôrs, ducj i trê si son cognossûts al “Animator factory”, scuele-laboratori inmaneât timp indaûr de Arcidiocesi di Udin, par formâ e coordenâ chestis figuris a pro des glesiis di paîs. Po, ognidun al veve cjapât la sô strade. David si lauree in dissiplinis di cine teatri e musiche, Christian al studie siencis de educazion a Udin, Marco al finìs il Sello e si da ae art. La idee di tornâ a metisi dongje e ven propit cuant che al jes il bant di “Joy!”. Ma – curiositâts e gnove sfide – a vevin un probleme. Un di lôr, chel di Colorêt, nol veve mai fevelât par furlan in vite sô. Il trio lu à trasformât in câs sperimentâl. «Al à imparât la lenghe furlane fasint la trasmission. E nô lu inzornavin sui siei progrès» al dîs Benvenuto. Un pôc par volte, in 3-4 mês. Il zovin cumò lu dopre a cjase e cul rest dai Cjastrons, in maniere spontanie. «Al è stât une specie di esperiment sociâl che al sclarìs la nestre atenzion par dute chê int dal “lu-capìs-ma-no-lu-feveli” o che si vergognin di cjacarâ par furlan».
Ridi. Ma cun inteligjence. Lu àn za dimostrât al “Premi Friûl 2012”. Tal concors che ju à lançâts, invezit, vôt popolâr e critiche a àn dutun sentenziât sui “Cjastrons”: une inclinazion ae comicitât e ae improvisazion brilante. ■
Oscar Puntel