SPECIÂL – Secont uficiâl Spock, astronâf Enterprise, date astrâl 9801.1

Il tiermin «digital divide» si lu dopre il plui des voltis par definî la impussibilitât di une part de popolazion di acedi a Internet e, duncje, la impussibilitât di podê usufruî di chei servizis che a permetin – dì par dì – di podê jessi informâts, di informâ, di comunicâ, di fâ imprese in maniere eficace, di podê jessi contatâts – e di podê contatâ altris personis – cuntun «clic».
Il tiermin al varès di jessi declinât, in maniere plui slargjade, daûr di diviersis – e ancje plui significativis – acezions. Il «spartiaghis digjitâl» (no «divari», no «inferioritât»: cirìn di fâ il sfuarç di doprâ ben lis peraulis) nol è leât in maniere semplicistiche ae pussibilitât di colegâ il citadin a un fîl: cheste idee e nas de reminissence fuarte di une concezion materiâl e hardwaristiche dal mont des gnovis tecnologjiis, che daûr di cheste vision al sarès suficient cablâ il planet par realizâ il miracul de democrazie digjitâl.
E te nestre Regjon, come che si pues viodi cun facilitât, cheste vision e je predominante. Pal nestri model di disvilup regjonâl, al somee che il probleme vêr al sedi rivâ a ducj i coscj cuntun colegament di alte velocitât fin tal ultin stali di Pusee, daûr dal sproc «Adsl par ducj e cussì no sarìn plui un teritori che al reste indaûr».
Si podarès lâ indenant afermant che i responsabii des autostradis digjitâls (ma no dome) a continuin a mantignî intat il «spartiaghis» (che nol podarès jessi altri che digjitâl) tra centenârs di miârs di furlans residents fûr de nestre Regjon e noaltris. Ma o laressin, in aparence, fûr di teme.
E alore fevelìn des pacaris che, slambrant ancjemò une  volte lis nestris stradis, a puartaran a un gnûf risorziment tecnologjic lis nestris vals. La ipotesi e va daûr di un prin, fin tentatîf di risolvi il probleme dal ultin chilometri midiant di fantasmagorics colegaments satelitârs. Dal rest, sino o no sino une regjon di int uniche? Di fat il progjet al jere unic tal so gjenar. Dopo di cualchi an, cualchidun al à palesât dubis su la autenticitât dal document firmât «Secont uficiâl Spock, astronâf Enterprise, date astrâl 9801.1» e il progjet al pâr che nol vedi plui la stesse atrative.
Lant ator pe mont cun gno fi:
– Papà, ce ise chê robe?
– E je une antene, frut, si clame «ripetitôr».
– E a ce coventie?
– E covente par podê sintî la radio in ogni paîs che al è jenfri chestis monts.
– Ce biel! E se a metessin une antene come chê che si dopre par Internet, no si podaressial doprâ ancje Internet in ogni paîs spindint une vore pôc? No mo, papà?
Ce âstu di fâ?… A son fruts, no capissin lis robis dai grancj.
Permetêtmi une domande: il simbul de Regjon ise une acuile o isal un farc?
Luca Peresson