SPECIÂL SAPADE. Saro: “Se o jeri jo in Parlament, o varès spesseât a fâ tornâ a partî l’iter daurman”

La volontât popolâr dai citadins di Sapade e Cint a pro dal Friûl e à incuintrât il sostegn di cuasi ducj i nestris politics, ma la lentece dai passaçs parlamentârs, lis crisis di guvier, il cambiâ des maiorancis e une schirie di coincidencis negativis a àn vanificât, pal moment, ogni sfuarç di senatôrs, deputâts, dai conseis regjonâi di Friûl-VJ e Venit e de Provincie di Udin.
Di agns Ferruccio Saro (senatôr de legjislature precedente) al à operât in maniere cuotidiane a pro dal passaç di Sapade e di Cint al Friûl. Costant al è stât il so contat cui comitâts e i aministradôrs dai doi comuns, la opare di sensibilizazion e ricercje dal consens “Pro Friûl” tes stanziis dai palaçs romans e je stade fine e trasversâl, di comission in comission, di ufici in ufici. Il senatôr di Martignà al à fate sô la cause di Sapade e Cint parcè che le à simpri considerade “Legjitime parcè che e nas dal desideri, rinfuarçît di un referendum, des popolazions locâls di tornâ in Friûl par resons di nature economiche, ma soredut linguistiche, storiche e culturâl”.
Se al fos ancjemò in Parlament, ce fasaressial?
“O varès fat tornâ a partî daurman l’iter legjislatîf, robe che e varès di sucedi stant i tancj contats tignûts tra i comitâts di Cint e Sapade e la senadore Isabella De Monte”.
O vin savût che ancje se nol plui in Senât, i rapuarts cun Sapade e Cint a continuin…
“Di là de politiche, di là de finalitât, e je nassude une biele amicizie. Cun chei di Cint e di Sapade si cjatìn e si sintìn dispès. A son stâts simpri presints ai incuintris che o ai promovût a Martignà li dal ‘Podere’. Il lôr intervent nol è mai mancjât e il Prin di Jugn ju ai presentâts a la Presidente de Regjon Debora Serracchiani e a ‘Libera Civiltà’ la associazion che e à condividude la cuase”.
I timps par gambiâ targhis, boi e cjartutis gjeografichis?
“Cheste volte il dut al varès di risolvisi plui di corse viodût che a son inmò bogns i parês favorevui des Regjons Venit e Friûl-VJ”
Sapade e Cint in Friûl?
“Sperìn in curt” al siere Saro. ❚
Daniele Martina