SPECIÂL – L’avignî? Tignìn di voli il telefonut

La ultime novitât inte evoluzion de Rêt e je chê dai Social Media. Di fat, buine part dal trafic Internet e je daûr a spostâsi su lis rêts sociâls.
Facebook, MySpace e altris, a permetin nivei di interativitât tra i utents des communities (comunitâts virtuâls, NdR.) più alts, a pet di chei che o jerin usâts cui blogs. I SM a son une novitât che e je daûr a cjapâ forme un pôc ae volte, e no esistin ricetis definitivis. La prossime sfide par cui che al vûl produsi contignûts e podarès sei il disvilup dal gnûf Web, o ben il Web dai dispositîfs mobii. L’iPhone e i Touch Phone dal HTC a son i prototips des tecnologjiis che a coventaran fra pôc timp a milions di utents par navigâ, par telefonâ, par fotografâ, par zuiâ e par disbarbâsi, definitivementri cence fîi. Ai «internautis» cul voli che al cjale al futûr, o conseìn duncje di tacâ a cjapâ confidence cun chescj imprescj, par fâsi une idee di cuâl che al sarà l’aspiet dal web viodût di une scjatulute pôc plui grande di un pacut di Marlboro lungjis, e di cemût che chescj ogjets stranis a puedin coventâ par zontâ un pinsîr, intant che si è daûr a tornâ a cjase cul autobus o cuant che si è in spiete discunide te anticjamare dal ambulatori dal miedi di famee.
Matteo Baldan