SPECIÂL – In Friûl dîs mil volontaris de Protezion Civîl

Cu lis peraulis “protezion civîl” si definissin dutis lis ativitâts e lis struturis metudis adun a nivel istituzionâl par tutelâ la vite, i bens, i insediaments e l’ambient dai dams che lis calamitâts naturâls o altris events a puedin produsi. Cemût ise nassude la Protezion Civîl taliane? Dal sigûr, un grues sburt ae sô istituzion al è vignût des grandis emergjencis capitadis tal Paîs, tacant de aluvion di Florence dal 1966, e soredut cui taramots dal Friûl e de Irpinie. In ocasion di chescj fats, pe prime volte tal daspovuere, si è viodude une grande mobilitazion spontanie di citadins di ogni etât e cundizion, rivâts a miârs di ogni bande di Italie e dal forest tes zonis disastradis par metisi a disposizion e par “dâ une man”. Al è stât subite clâr che a mancjâ no jere duncje la solidarietât de int, ma ben un sisteme public organizât che al savès metile in vore e dâi valôr. Par chest, la nestre Regjon e à pensât di meti in pîts un volontariât no plui improvisât su la fonde di sburts emozionâi, ma struturât e inserît intun Sisteme regjonâl integrât di protezion civîl, formât di sogjets usâts a colaborâ no dome in emergjence ma ancje “in timp di pâs”.
Cuant che il taramot al stocà la nestre regjon tal 1976 e jere in vore une leç statâl cetant limitade, fondade suntune culture de protezion civîl un grum centralizade e che e intervignive dome tal moment dai socors. Duncje in chê ocasion, par comedâ la situazion, a forin fatis buinis leçs speciâls che a permeterin di nomenâ un Comissari straordenari pe emergjence, cun competencis e podês ecezionâi, che al operà in racuardi une vore strent cu la Regjon e cu lis autonomiis locâls. Cun di plui, i sindics dai comuns disastrâts a forin nomenâts funzionaris delegâts ae ricostruzion, cun cjamps precîs di autonomie gjestionâl e finanziarie, sot dal coordenament dal Comissari straordenari. Tal 1986 la nestre regjon e fo di gnûf inovative rispiet al rest de Italie: di fat, si indotà di une leç di Protezion Civîl che e anticipave i timps e che a nivel nazionâl e fo formulade dome sîs agns dopo, tal 1992. La puartade “rivoluzionarie” di cheste leç regjonâl e sta tal fat di incentrâ lis azions di protezion civîl sui trê moments fondamentâi de prevision e de prevenzion, dal socors e dal tornâ aes cundizions di normalitât, daûr di ce che si veve imparât cu la tragjiche esperience dai taramots dal 1976. Tai agns daspò (2000 e 2001), altris leçs regjonâls a àn previodût la pussibilitât di cjapâ dentri tes operazions di emergjence di competence de protezion civîl regjonâl ancje i intervents di solidarietât nazionâl e internazionâl, cun azions di socors aes popolazions che a vedin patît events calamitôs, come tal câs dal taramot dal Abruç.
Te nestre regjon i volontaris di protezion civîl a son cirche dîs mil: di chescj, vot mil a fasin part dai grups comunâi e doimil aes associazions di volontariât di Protezion Civîl. Par aderî al volontariât di Protezion civîl dal Friûl-Vignesie Julie si pues jentrâ o tal Grup comunâl di volontaris dal propri comun di residence o pûr intune des associazions di volontariât iscritis tal elenc regjonâl dipueste.
LINDA PICCO