SPECIÂL – Cronache: la rêt prime des agjenziis?

Aes 3 e 32 de buinore di domenie ai 6 di Avrîl e je stade la grande scosse. Chê di magnitudin 5,8 che e à stocât L’Aquila e dintors. Aes televisions ur à coventade plui o mancul une ore e mieç par dâ la notizie. Aes edizions online dai cuotidians ur son voludis plui di trê oris. Su Twitter (il micro blog ancje vie celulâr), lis notiziis a àn tacât a circolâ cuasi in timp reâl.
«La cjase e trimave tant che une fuee. Teribil!» al è un dai tancj messaçs publicâts vie pe gnot dal taramot. Cuant che i mieçs di comunicazion tradizionâi a àn tacât a ocupâsi dal câs, Twitter di lûc de cronache si è trasformât in casse di risonance. Prime al à amplificade la polemiche su la alerte dade fûr dal tecnic Gioacchino Giuliani tai dîs prime dal sisme, une cuistion che e je costade a Giuliani une denuncie par procurât alarm. Po dopo al à metût in lûs la disumanitât dal TG1 che si è svantât dai siei dâts di scolte intant che si jere ancjemò daûr a sgjavâ tra i rudinaçs. Tal stes mût al è stât metût in risalt l’estremisim di Radio Maria, che dai siei microfons Pari Livio Falzanga al à declarât che «il Signôr al à volût in cheste Setemane Sante che ancje lôr a cjapassin part al misteri de sô passion», riferintsi ai taramotâts. Su Twitter si son ancje moltiplicâts i riferiments ae stampe foreste che e à rimarcade la figurate dal president dal Consei Silvio Berlusconi che al à declarât a une television todescje che i sfolâts sot des tendis a varessin vût di calcolâ chel di Pasche «tant che une fin di setemane in campeç.» Utents di dut il mont a àn ae fin condanât il complasiment di grups jihadiscj dongje di Al-Qaeda, che dai lôr sîts a àn scrit che il taramot al è une punizion divine cuintri i nemîs dal Islam.
Tancj Furlans su Twitter a àn manifestât la lôr solidarietât ae int dal Abruç laudant chei che tra nô si son dâts di fâ par socori i taramotâts. «Furlans za presints e operatîfs al 100% in Abruç, SIMPRI volontaris, mai indaûr», al scriveve juste apont @maxpola aes 11.33 dai 7 di Avrîl passât.
Matteo Baldan