SPECIÂL – Cincuantenari di un progjet ardît

Mortean al à un Domo che dal 1898 fin al 1956 al à rapresentât cu la sô volumetrie l’element fondamentâl inte planimetrie dal paîs, logât però intune largjure – par antîc la «curtine», opare di fortificazion che si cjatave une volte tai paîs de plane furlane – che in chê epoche lu cercenave, isolantlu e fasint sintî ancjemò di plui la mancjance di chel tor che inmò nol esisteve.
UN PROGJET ANTÎC_ Za di une vore di timp la popolazion e domandave la sô costruzion; e veve ingrumât cuasi un miâr di gruessis pieris ator dal sagrât. Un progjet dai agns ‘30 al varès volût ancje cjapâ dentri un serbatori di aghe, ma la Seconde Vuere e à rimandade la edificazion.
1954: SI INVIIN I LAVÔRS_ Finalmentri, tal 1954 l’Arcipredi Bons. Valentino Buiatti, in acuardi cu la Comission locâl, al incaricà l’architet Pietro Zanini (za autôr dal pulpit e des sentis dal Côr dal Domo) par che al progjetàs il tor. La forme planimetriche, in strente armonie cun chê dal Domo, e je otagonâl; Zanini al tignì cont de valorizazion di un sôl pont focâl di acentuâ verticalmentri dentri dal tiessût urban dal paîs. Il tor al fo pensât essenzialmentri tant che struture. La direzion dai lavôrs pes fondis e fo dal architet Zanini: lis voris a forin cetant seguidis, cuntune grande partecipazion popolâr tant che lavoranzie. Cuant che al fo dal dut clâr il progjet colossâl e moderni, la int e partecipà ancje al finanziament par mieç dal arlevament e de vendite dai cavalîrs.
BRAURE_ Mortean al è simpri stât braurôs dal so tor – il plui alt di Italie, cui siei 113,20 metris – come pûr de sô blave (cumò marche depositât). E al à vût reson, stant che i lavôrs finîts ai 22 di Avost dal 1959 a son stâts sierâts dopo un totâl di 54.000 oris di vore cence nissun incident, no cate che no fossin armaduris esternis e che in chê epoche si lavoràs in maniis di cjamese.
Pieri Zanini