SPECIÂL BIBIE – Il parcè di chest speciâl

La leture continue de Bibie par furlan fate ai prins di Avrîl dal 2011 al è stât un event storic. No dome dal pont di viste culturâl, ni pal fat che e sedi stade la prime intune lenghe minorizade, ma massime pe grande partecipazion, sedi numeriche sedi di cûr.
Ancjemò une volte il popul furlan al à dimostrât di tignî ae sô culture, cui fats. Dut chest al à vût dome une atenzion momentanie: finît l’event, subit al è colât il cidinôr. Media, politiche, culture “gruessis” (gruessis pal volum de vôs) lu àn cjalât cu la solite superficialitât, tant che un fat folcloric e no un fat de vite vere di un popul. Une distance penze jenfri int e “intellighenzia”– a part raris ecezions – che no mancje mai cuant che al sucêt alc che al testemonie la anime furlane dai furlans, che di fat si vûl dislidrisâle. Une buse (ma al sarès miôr clamâlu foran) che La Patrie dal Friûl i à simpri cirût di meti un blec partint dal sô jessi scrite in lenghe furlane e ricuardant simpri lis figuris e i fats che a àn fat grant il Friûl. Al è il stes lavôr che o cirìn di fâ vuê, celebrant cuntun speciâl di pueste l’event culturâl plui impuartant che si è davuelt in Friûl dal 2011 (celebrazion pai 150 agns dal Stât Talian comprindudis, si intint).
Dree Venier