Une fieste pai slovens di Triest, une strente di man tra Slovenie e Italie

I  presidents des Republichis di Italie e Slovenie, Sergio Mattarella e Borut Pahor, e plui ministris dai doi guviers a àn firmât il memorandum di acuardi pe restituzion dal Narodni dom di Triest ae comunitât slovene in Italie. La cerimonie e je stade inmaneade ai 13 di Lui. Nol è un câs: fassiscj e nazionaliscj a tacarin e a derin fûc al Narodni dom, cjase de culture slovene, juste 100 agns prime, ai 13 di Lui dal 1920. Inte stesse zornade, a tacarin ancje 21 organizazions slovenis e slavis di Triest.
◆ Il document al stabilis che il Narodni dom al sarà di proprietât di une fondazion metude adun des dôs organizazions de comunitât slovene in Italie, Svet slovenskih organizacij (Confederazion des organizazions slovenis) e Slovensko kulturno-gospodarska zveza (Union
culturâl economiche slovene). Ancje se il procediment al durarà avonde agns, di bande slovene la restituzion de struture e somee un at simbolic di riconciliazion intun spirt european, che al fasarà ben ai rapuarts tra Slovenie e Italie.
◆ Il president sloven Pahor al à dit che cun cheste firme il tuart di cent agns indaûr al è stât coret. Cheste e je une ocasion di fieste pai doi Paîs, cuntun salt indenant par slovens e talians e un alineament des stelis daspò cent agns là che si son viodudis lis ditaturis di Mussolini e di Tito, lis foibis, lis vitimis dal antifassisim, tieris contindudis, la repression des minorancis, i esui e la negazion des identitâts.
◆ Il president talian Mattarella al à zontât che no si pues scancelâ la storie e nancje lis esperiencis dificilis de int di dutis dôs lis bandis dal confin, superadis cu la decision comun di jentrâ te Union europeane. Chest percors al va viers il futûr, cun valôrs comuns tant che libertât, democrazie e pâs.
◆ Prime de cerimonie de firme a Triest, Mattarella e Pahor a son stâts a meti coronis al monument dai cuatri fusilâts di Basovizza e al monument de foibe di Basovizza: sielte che e à vût critichis, sedi in Slovenie che in Italie. I presidents a àn fat onôr ai doi monuments tignintsi par man; par cualchi minût denant de foibe di Basovizza a àn ancje fevelât a tu a tu, cence declarazions particolârs. Mattarella e Pahor a àn conferît al scritôr Boris Pahor, che al parten ae minorance slovene di Triest, lis plui altis onorificencis taliane (Cavalîr di gran crôs) e slovene (Ordin par merits straordenaris) pal so contribût ae comprension e ae creazion di leams tra i popui de Europe e pal so impegn par slovenitât e democrazie. Il scritôr di 107 agns, che al à viodût brusâ il Narodni dom cui siei voi, al à dedicât il ricognossiment aes vitimis dai cjamps di concentrament, dal nazisim, dal fassisim e de ditature comuniste. Lui stes al fo perseguitât dal fassisim, depuartât tai cjamps di concentrament naziscj e bandît de Jugoslavie di Tito. ❚