Sfuei Mensîl Furlan Indipendent
Archivi de Patrie

SLOVENIE. Puaretât in Slovenie confrontade cun la Europe. La crisi e somee passade, ma i problemis a restin.

............

I indicadôrs economics al somee che a mostrin che la crisi in Slovenie e je passade aromai, ma daûr dai dâts dal Ufici di statistiche statâl, relatîfs al 2015, plui o mancul un tierç de popolazion e va indevant a vivi inte spirâl de puaretât.
A son di fat 287 mil lis personis che l’an passât no àn vût avonde risorsis par une vite dignitose: il 14,3%, su par ju un citadin su siet. Cun di plui, 385 mil personis (une su cinc) a son stadis esponudis al pericul di esclusion sociâl. La plui part di chei che a àn vivût disot dal nivel di puaretât e je fate di pensionâts (78 mil), disocupâts (65 mil), zovins (54 mil), dipendents lavoradôrs (34 mil) e lavoradôrs autonoms (20 mil).
Al va in ogni câs marcât che la tindince e je in calâ, ancje se il sbassament regjistrât al minim, dal 0,2%: 4 mil personis in mancul rispiet al 2014. In calâ (un pôc mancul de 1%, 17 mil abitants) ancje il numar di personis vitimis di deprivazions materiâls gravis, che a rivin a 117 mil, il 5,8% de popolazion. A cjapâsi il merit di chest miorament al è stât ancje il guvier in gracie aes misuris sociâls introdotis.
Plui alte di 253 euros rispiet al 2014 il nivel di pericul di puaretât: l’an passât al rivave a 7.399 euros di redit anuâl par une famee fate di une persone (617 euros nets al mês par adult) o a 1.295 euros al mês par une famee di cuatri components cun doi fruts sot dai 14 agns di etât. In Slovenie cun 617 euros si puedin cuistâ 620 pagnochis di pan blanc di 400 g o plui o mancul mil latinis (5 etolitris) di bire o 30 chilograms di un detersîf di cualitât. Al va zontât che il redit medi net anuâl par membri di famee in Slovenie e rive a 8.746 euros.
Il soiâr di pericul puaretât in ogni câs in Slovenie al è avonde bas. Su la base dai dâts de Eurostat, però dal 2014, chest soiâr in Italie al jere di 9.455 euros, 12 mil in Gjermanie, fin a lâ ai 14 mil de Austrie e al rivave fintremai a 26.265 euros in Norvegje (il valôr massim al è stât regjistrât intal 2014, intal 2015 il valôr al è lât jù a 24.890 euros). Il soiâr plui bas al è chel de Macedonie (1.169 euros). Inte Union europeane intal 2014 a àn vivût in puaretât 122 milions di personis (64,6 milions di feminis e 57,6 milions di oms). Il pericul di puaretât plui alt al è stât regjistrât in Romanie (25,4%), chel plui bas in Islande (7,9%). In Italie e rivave a 19,4%. La medie de Union Europeane (28 paîs) intal 2014 al jere il 17,2%.
Par ce che al tocje la esclusion sociâl, si lei sul cuotidian sloven Delo che plui o mancul vincj agns indaûr al è stât dissegnât – su la base des rilevazions – il profîl ipotetic di un abitant subiet a esclusion sociâl: anzian, pôc istruît, che al vîf intune piçule citât di bessôl o che e fâs part di une famee slargjade, o une persone che si interesse di agriculture, o un disocupât, o che al lavore dome in maniere ocasionâl, o une femine di cjase. Cumò l’escludût sociâl sloven “tipic” al larès cirût inte regjon tor dal flum Sava, dit Zasavje, li che i paîs cun plui densitât di popolazion a àn 17.000 personis, e dulà che un resident su cinc al è pensionât, un su cuatri disocupât, e il nivel di istruzion gjenerâl al è avonde bas. ❚
Tjaša Gruden

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +