Il Guvier sloven al colaborarà in maniere uficiâl cui rapresentants des comunitâts nazionâls autoctonis taliane e ongjarese in Parlament. L’acuardi al è stât sotscrit ai 16 di Otubar di doi deputâts – in Slovenie aes minorancis taliane e ongjarese ur ven garantît de costituzion il seç in Parlament e intai orghins eletîfs a nivel locâl -, chel talian Felice Žiža e chel ongjarês Ferenc Horváth, e dai rapresentants di ducj i cinc partîts de coalizion, duncje LMŠ (Liste di Marjan Šarec), SD (Socialdemocratics), SMC (Partît dal centri moderni), SAB (Partît di Alenka Bratušek), e DeSUS (Partît democratic dai pensionâts slovens). Il prin ministri Marjan Šarec (ae vuide di un Guvier di centriçampe) al nomenarà, dentri dal propri Gabinet, la persone incargade di stâur daûr aes cuistions che a interessin di plui lis comunitâts nazionâls e ae atuazion dal acuardi, valit par dut il mandât, duncje pal cuadrieni 2018-2022.
L’acuardi cu lis comunitâts nazionâls, che nol è une novitât in Slovenie – il prin a firmâ un document simil al jere stât za il Guvier di Janez Janša intal 2004 -, al garantìs un impegn de coalizion te atuazion dai dirits des comunitâts nazionâls autoctonis, a cjapâ dentri i orghins e i rapresentants des minorancis intai procès decisionâi cuant che a vegnin cjapâts proviodiments che lis tocjin. Si trate, in linie gjenerâl, di setôrs fondamentâi tant che istruzion, economie, culture e ûs public de lenghe minoritarie. Al sigure ancje che il Guvier si sfuarçarà di miorâ la cundizion des minorancis, risolvint lis criticitâts, e si impegnarà a definî une leç di suaze di tutele des comunitâts nazionâls taliane e ongjarese.
No si trate in ogni câs di un acuardi di coalizion. Žiža e Horváth, duncje, no fasaran part de maiorance e no varan nissun vincul di vôt, ma a podaran risultâ decisîfs intes votazions in Parlament, cuant che si tratarà, par esempli, di aprovâ i proviodiments principâi pal Paîs – i doi deputâts a condividin lis liniis programatichis dal contrat di Guvier -, viodût che la Slovenie e à pe prime volte un esecutîf di minorance che al pues contâ dome su 43 vôts (su 90 seçs).
La poie di Žiža e Horváth e podarès jessi ancjemò plui impuartante dopo che e je mancjade, almancul pal moment, la firme dal protocol di colaborazion tra la coalizion e la çampe (e sarès une poie esterne buine par cualchi progjet condividût). Definîts i contignûts prime de nomine dal prin ministri Marjan Šarec, sostignût apont ancje de çampe, la firme e je slitade di pôc par vie de insodisfazion par cualchi decision dal Guvier che e sarès in contrast cul protocol. ❚
Tjaša Gruden