Sfuei Mensîl Furlan Indipendent
Archivi de Patrie

Libertât dai mieçs di comunicazion, al è scuintri jenfri Slovenie e UE

Luciano Lister

Viers la fin di Lui, te seconde relazion anuâl sul stât di dirit tai Stâts membris de Union europeane, la Comission europeane no à pandût preocupazion dome pal ritart de Slovenie te nomine dai procuradôrs statâi e europeans delegâts, ma e à dit a clâr di jessi preocupade ancje par un pussibil lâ in piês de situazion pai media.
◆ La gnove e je rivade juste tal mês che la Slovenie, vuidade dal guvier di centridiestre di Janez Janša, e à cjapât la presidence semestrâl de Union europeane. Intun comunicât in rispueste ae relazion de Comission europeane sul stât di dirit in Slovenie, il Ministeri de Culture de Republiche de Slovenie, vuidât di Vasko Simoniti, al scrîf che tal document de Ue dispès no si ten cont des rispuestis e dai sclariments inviâts dal guvier sloven su la libertât dai mieçs di comunicazion.
◆ Te relazion, la Comission europeane e scrîf ancje de cruzie dai azioniscj par ce che tocje il mancjât finanziament de agjenzie di stampe slovene Slovenska tiskovna agencija (STA). La Comission e fevele dal conflit legâl tra l’Ufici dal guvier sloven pe comunicazion e la STA tant che di un câs di pression politiche sui media. Ancje su chel cont, dut câs, il Ministeri al declare che il guvier e i siei membris no varessin mai fat pressions di cheste fate.
◆ Ae afermazion de Comission europeane che lis angariis su internet e il numar di acusis cuintri dai gjornaliscj a cressin, il ministeri de Culture al rispuint di no vê evidence che i gjornaliscj a vedin censuris o si fasin censure di bessôi. Ancje une relazion dal State Department american e dimostrarès che il guvier sloven al rispiete la libertât di peraule e di stampe, ancje di plui dal guvier precedent, vuidât di Marjan Šarec. A nivel gjenerâl, il pericul dai gjornaliscj par ce che tocje l’acès aes informazions publichis nol sarès aumentât.
◆ Al Ministeri de Culture no pensin nancje che il bloc temporani dai paiaments pal bant anuâl pal cofinanziament dai contignûts media al vebi fat dam economic ai mieçs di comunicazion.
◆ In sumis, la Comission europeane e il guvier sloven no somein masse dacuardi. Ma il Ministri al à pandude ancje sodisfazion, parcè che te relazion Ue si fevele ancje dal probleme de concentrazion di proprietât dai media. Il guvier sloven al vûl proponi intervents di leç par limitâle, e i siei membris a pensin che al coventarès intervignî a nivel european par dâ un segnâl fuart cuintri dai “trust” in chest setôr strategjic. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +