SLOVENIE. La leiende alpine dal Zlatorog

MÎTS_Sicu lis monts furlanis, ancje chês de vicine Slovenie a son teatri di leiendis, flabis e mîts nassûts in ete une vore antighe. Protagoniscj di chestis storiis contadis di pari in fi a son pe plui part oms e feminis salvadis, fadis, animai dotâts di cualitâts e podês speciâi e vie indevant. In cheste ultime categorie o cjatìn par esempli il Cierf blanc de Stirie slovene e il Cjaval blanc su la mont Vršac.
CJAMOÇ_L’animâl lezendari plui cognossût al è dut câs il cussì clamât Zlatorog, il Cjamoç cui cuars di aur, deventât il simbul dal mont alpin sloven, tant che la sô nomee di imortalitât e je rivade fin al dì di vuê. La storie e tache dongje dal Triglav/Terglau, la mont plui alte de Slovenie cui siei 2864 metris, li che une volte al jere pardabon un paradîs alpin. Culì a vivevin lis Rojenice, clamadis ancje “Damis blancjis”, che in sens leterâl a saressin lis fadis “de nassite”, par vie che a judavin a nassi i fruts e a cressi lis jerbis pes bestiis che culì a lavin a passon. A jerin buinis, ma a volevin jessi lassadis in pâs: nissun al veve di olsâ svicinâsi. Par chest, a protezilis a jerin dai cjamoçs blancs, animâi stupents e fuarts: come vuide a vevin il cjamoç plui fuart di ducj, il Zlatorog, dal pêl blanc lusint e dai cuars di aur, fat deventâ imortâl des stessis Rojenice traviers di un magheç. Se al vignive colpît, a pene che une gote dal so sanc e colave par tiere, ancje sul cret o su la nêf, e faseve nassi daurman une rosute rosse (Roža mogota) che, ancje se lui al ves mangjât dome une sô fuee, i varès fat vuarî dibot lis feridis.
TESAUR_Un altri segret si taponave tai siei cuars di aur. Tant che une clâf, a vierzevin lis puartis de grote li che al jere tignût il tesaur de mont Bogatin, alte 1977 metris, une ricjece di no podê rivâ a calcolâle, vuardade di un mostri sarpint cun plui cjâfs. Clâr che dutis chestis ricjecis a clamavin dongje plui di cualchidun, cun chê di puartâlis vie. Par esempli, si conte che un marcjant venezian, ingolosît dal tesaur, al fos rivât a gafâ chel ben di Diu; dopo jessi stât daûr dal Zlatorog, al rivà adore a cjapâ une sclese di aur colade dai siei cuars intant che al beveve tune sorzint, midiant di chê al rivà a jentrâ cence fastidis te mont e a puartâsi vie dut l’aur che al voleve.
CJAÇADÔR_Destin dal dut difarent invezit par un fantat de Val Trenta. Li che il riul Koritnica al va tal Lusinç, e jere une locande che e dave acet a marcjadants venezians che a lavin par afârs in Gjermanie. Culì e lavorave la fie de parone, une fantate di une bielece cence pâr, che e morosave cun chest zovin, il miôr cjaçadôr di cjamoçs de valade, che dispès i regalave rosis di mont e salvadi. Une dì, un di chescj marcjadants al rivà a ingolosî la fantate cun sedis, zoiis e aur, tant che jê e refudà un invît al bal di bande dal so morôs. Sintintsi ufindût, il zovin cjaçadôr al pensà di lâ a cjapâ il tesaur de mont Bogatin, scoltant il consei dal “Cjaçadôr vert”, che al jere nuie di mancul che il Diaul. Chest i disè di copâ il Zlatorog par vê il tesaur. Il fantat alore al brincà il Cjamoç e lu copà cuntun trai di fusîl. La bestie però e tornà daurman in vite mangjant la Roža mogota: il zovin al fo inceât dal lusôr dai siei cuars tant di pierdi l’ecuilibri e di colâ jù tes aghis dal Lusinç, murint a colp. La fantate, za pintude, e fo disperade tal viodi il so morôs cence vite. Cuant che po, sul finî dal Istât, i pastôrs a tornarin te Alte valade dal flum, a cjatarin un paisaç desolât, dome di claps; lis Rojenice e il Zlatorog a vevin bandonât chel paradîs par vie de tristerie e de aviditât dal om. Il Zlatorog al è duncje il messazîr de lûs (par vie dal so colôr blanc) e dal soreli (par vie dai siei cuars di aur); par chest, al à punît l’om par vê olsât profanâ la integritât de Nature. ■
Alessio Potocco