La cuarte bugade no lasse cuiets: il Covid al torne a fâ pôre

Bielzà si tache a fevelâ di cuarte bugade de pandemie di Covid-19, ma in Slovenie i vacinâts inmò no son masse. A completâ il cicli a son stâts 1,12 milions di personis, ven a stâi il 53,4%. Par fâ un confront, in Italie a son lâts a fâsi fâ ancje la seconde dose di vacine 43 milions e passe di personis, il 72,7%.
◆ Ancje cumò che si tache a fevelâ di tierce dose di vacine par cualchi fasse de popolazion, il seticisim su lis manieris par contignî la pandemie di bande de popolazion al è avonde alt. Chest al vâl tant tes zonis di mont che tes localitâts plui piçulis dal stât, li che lis personis a son “naturalmentri” a distance une di chê altre.
◆ Une altre volte, cussì, i dâts su la difusion dal Covid in Slovenie no lassin sperâ pal miôr, parcè che i numars a van indenant a lâ sù.
◆ Ae fin di Otubar la percentuâl par dì di esams PCR positîfs e passave il 40%, cun plui di 27.000 câs di personis cun infezion ative e il record di infetâts atîfs in contemporanie dal inizi de pandemie.
◆ Tai reparts dai ospedâi risiervâts pe cure dal Covid-19 a jerin plui di 570 pazients; di chescj cuasi 140 in terapie intensive. I muarts a restavin sot i dîs in dì, ma cun previsions di cressite par Novembar.
◆ Daûr di une proiezion dal Istitût di ricercje Jožef Stefan, in curt lis capacitâts dai reparts di terapie intensive a saran esauridis. In chê volte cui che al varà dibisugne di jessi curât al varà di jessi puartât tal forest, se si podarà. Al podarà ancje jessi che i miedis a scuegnin sielzi par cui tacâ i respiradôrs e cui lassâ cence. Une sielte che nissun operadôr de sanitât al volarès fâ, come che al è bielzà stât in Lombardie cuant che e je tacade la pandemie.
◆ L’Istitût Stefan al previôt che i numars di infetâts a laran avonde sù dentri de fin di Novembar. In chest periodi a muraran plui di 400 pazients ricoverâts pal Covid-19, intun stât che al conte plui o mancul 2 milions di abitants. Al sarès come se in Italie, cun passe 59.000.000 milions di abitants, tal stes periodi a murissin 11.800 personis. Par chest, cul inizi di Novembar lis misuris par contignî la pandemie fatis buinis dal guvier di centridiestre de Republiche di Slovenie, vuidât di Janez Janša, a saran dal sigûr simpri plui restritivis. ❚