In ocasion de Zornade mondiâl de aghe, che si celebre ai 22 di Març e che chest an e à tant che teme centrâl “La nature pe aghe”, l’Ufici di statistiche statâl sloven al à furnît cualchi dât sul consum e sul tratament de aghe in Slovenie, paîs che – intal Novembar dal 2016, prin in dute la Union Europeane – al à metût te costituzion une norme che e definìs la aghe tant che ben public e duncje tant che dirit fondamentâl par ducj i citadins. Ancje in Slovenie, stât plen di disponibilitâts idrichis, a son di fat cussients de dibisugne di une gjestion sostignibile des risorsis viodût che, par esempli, tra il 2014 e il 2015 la disponibilitât di aghis dolcis si è cuasi dismiezade.
Intal 2016, par furnî i acuedots publics, a son stâts pompâts di variis risorsis idrichis 162 milions di metris cubis di aghe. Par vie de cundizion triste dai implants e dai condots però, 45 milions di metris cubis (cuasi il 28%) a son lâts pierdûts. Dai 117 milions di metris cubis rivâts a destinazion, plui o mancul 78,4 milions a son stâts doprâts des fameis: il consum medi pro capite al è stât di 38 metris cubis di aghe, o sedi 104 litris in dì.
In totâl invezit, di risorsis idrichis di superficie (pal 80%) e di risultivis soteraniis (pal restant 20 par cent) a son stâts pompâts 887 milions di metris cubis di aghe. Plui di 900 milions a son stâts invezit i metris cubis di aghis di scaric fluidis indaûr intes disponibilitâts idrichis di superficie, e pe grande part a vegnin de industrie (707 milions, la cuantitât plui basse dal 2013, cuintri i 200 che a vegnin de canalizazion publiche).
Lis aghis refluis de canalizazion publiche in Slovenie a son stadis depuradis intal 68,6% dai câs. Tra lis areis slovenis là che lis aghis di scaric a son stadis ogjet di tratament intune percentuâl minôr e je chê de zone di Gurize, che a fasin part ancje i comuns intor de fasse confinarie de provincie di Udin. In cheste regjon, lis aghis depuradis prime di tornâ a fluî tal ambient a son stadis il 67%.
di Tjaša Gruden