Su iniziative de Slovenie, chest an, ai 20 di Mai, in dut il mont si è celebrade pe prime volte la Zornade mondiâl des âfs. Prime de ricorence di chest an, di fat, dome la Slovenie e celebrave in cheste dade i siei apicultôrs (intal 1734 al è nassût in cheste dì Anton Janša, il prin insegnant di apiculture tal mont), ma tal Dicembar passât la propueste slovene di dedicâur une zornade aes âfs e je stade aprovade infin de Onu. Il fin di cheste iniziative al è, cemût che al rimarche il president de Associazion dai apicultôrs slovens Boštjan Noč -che al è stât, trê agns indaûr, il prin promotôr de Zornade mondiâl des âfs – visâsi almancul une volte l’an de impuartance di chescj insets e di chei altris impolinadôrs pe cjadene alimentâr intal mont e pal ambient in gjenerâl.
La apiculture e je un setôr de agriculture avonde difondût in Slovenie. A son plui o mancul 10 mil di fat i apicultôrs.
Si trate in ogni câs di arlevaments di âfs – la raze autoctone slovene e je chê cjargnele – in gjenerâl avonde piçui. I apicultôrs slovens a arlevin, di fat, in medie mancul di 20 coloniis di âfs e la lôr produzion di mîl no baste par sodisfâ il consum interni che al è di plui o mancul 2 chilograms a persone ad an. In Slovenie, in particolâr intai ultins 10 agns, al è stât promovût a fuart il consum di mîl. Intes scuelis, par esempli, e je stade introdote la iniziative “Gulizion cu la mîl” (che po dopo e je deventade la “Gulizion slovene” e la “Zornade de mangjative slovene”).
La Slovenie, dulà che a son daûr a afermâsi simpri di plui ancje la apiterapie e l’apiturisim, e à sielt propit il mont des âfs e de apiculture tant che un dai cinc temis principâi proponûts intal propri paveon ae Expo 2015 di Milan.
Inte presentazion, al è stât evidenziât ancje il valôr artistic particolâr dai bôçs slovens, caraterizâts des “panjske končnice”, panei di len decorâts e piturâts in maniere origjinâl cun motîfs religjôs e de vite cuotidiane, che a sierin i bôçs. Al è un dai elements plui cognossûts de art popolâr slovene. ❚
Tjaša Gruden