«I Comuns in dì di vuê a son libars… di scugnî rangjâsi!»

Interviste a Linda Tomasinsig, sindiche di Gardiscje
Chel di Gardiscje al è un dai prins Comuns che al è jentrât te ACLiF – Assemblee de Comunitât Linguistiche Furlane, duncje nol mancje di convinzion, ma al è stât un pêl faturôs rivâ a intervistâ il sindic o sindiche («par me al è compagn, baste che no mi disin sindichesse», mi à dit ridint). O tachi duncje la interviste domandant a Linda Tomasinsig dai tancj impegns che al à un sindic in dì di vuê: in tancj di lôr mi àn dit cussì.
__
Plui di un sindic mi à dit che la sô vite e je faturose. Isal cussì? E se sì, parcè?
Eh sì, e je propit cussì. Cun di fat, si cîr par fuarce di ridusi i apontaments. Par me i fatôrs a son plui di un: a son ladis in mancul lis risorsis creant carence di personâl, e je scjarsece di segretaris comunâi, che a son pôcs e sai contindìn fra Comuns, e une robe dai ultins agns e je stade la fature di gjestî la transizion al digjitâl. O sin intune sorte di periodi intermedi li che a àn di jessi ancjemò tancj documents analogjics e il lôr dopli digjitâl. Si spere che plui indevant si larà in miôr, a passaç completât.
Un altri fatôr al è che i citadins tai ultins agns a àn tante plui voie di un contat diret cui aministradôrs, in ogni mût. Une robe che mi plâs, però i canâi par fâlu cumò a son pardabon tancj, e la lôr gjestion e puarte vie timp.
Po dopo, cu la riforme dai Ents locâi che no si è realizade ad implen, no si à rivât a meti dongje ben i Comuns par gjestî i servizis. Cualchidun al à rivât adore, ma no par vie di une organizazion madure a nivel complessîf. Insome, o sin plui libars di une volte cence ancje la Provincie parsore, ma libars di… scugnî rangjâsi!
__
Gardiscje ise jentrade te ACLiF cu la sô aministrazion, e parcè?
Sì, o sin jentrâts subit, vie pal gno prin mandât, parcè che chest teritori al è storichementri furlan, ancje se al centri di un teritori cun tantis diversitât e ecuilibris. Duncje e je stade une adesion naturâl.
__
Propit in merit ae vuestre posizion, ce influence si sintie di plui fra la vecje Gurize e chel che al somee un rampant Monfalcon? Isal vêr chest dualisim?
Sì, chest dualisim al esist, ancje parcè che Monfalcon nol è dome grant tant che economie, ma ancje di popolazion, cuasi un cuint “cjâf flûc di provincie”. Rispiet ae sô dinamicitât economiche e demografiche però ancje Gurize e à vût e e va indevant a vê un rûl impuartanton, pensìn par esempli al ricognossiment che al è rivât di resint di Capitâl Europeane de Culture pal 2025. Duncje l’ideâl al è che ognidun al eserciti un rûl daûr de sô specificitât, e al è spazi par fâlu ben. Tal mieç, nô Comuns plui piçui, che però o fasìn part di cheste comunitât e o vin il dirit di dî la nestre su lis variis cuistions. Par dî, su lis partecipadis, si scuen sintî ancje nô.
__
Cemût viodie il futûr pai teritoris de ex provincie di Gurize: passarano in maniere definitive sot di Triest?
Nol è dubi che pal futûr de Regjon si ponte tant sul puart di Triest, e duncje di consecuence i ecuilibris a sburtin par là. Jo no viôt chest “slungjâ lis sgrifis” di bande di Triest in competizion cul Friûl, ma no ai mai rifletût su la cuistion in chescj tiermins, o ai une vision plui gjenerâl. Se o ai di fâ une rivendicazion teritoriâl, o pues dî che al è di tant che il “Friûl austroongjarês” nol à un assessôr “di pês” a nivel regjonâl. Tornant al discors dai rapuarts cun Triest, o pensi che Monfalcon al è chel tant interessât a vêlu, ancje par vie dai puarts che a àn ducj i doi. Nô altris Comuns plui piçui sigûr no volìn jessi sotans di nissun, ancje parcè che chest teritori al à lis sôs vocazions particolârs; par esempli, o sin dongje dal Cuei, e o vin un tiessût sociâl particolâr, tant atîf, cun tante int che e met il so timp pe comunitât. Ancje se o sin piçui, o vin la nestre dignitât che e va tignude di cont.
__
La Assemblee podaressie fâ vê al Friûl plui pês politic e economic, o ise dome une istituzion culturâl?
Secont me, intune comunitât complesse, lis decisions e il balin in man lu à cui che al à la “egjemonie culturâl”. Le clami cussì semplificant cuntun tiermin un tic arût, ma che no mi intindi mâl. Se il Friûl al à voie di infuartî il so rûl, duncje, al à di infuartî la sô base culturâl, e in chest la Assemblee e pues fâ tant.
__
A proposit di culture e di lenghe furlane, in Comun vêso viodût dal Plan speciâl di politiche linguistiche (PSPL)? E, par curiositât, cun cartei e scuele cemût sêso?
O sai ce che al è, ma o scuen ameti che o sin indaûr su chest cantin. Sui cartei o ai cualchi dubi parcè che o volarès che e fos rispietade la fevele locâl, e chei a vegnin fats te variante standard. Cu lis scuelis o vin il massim de viertidure: o vin za colaborât a varis progjets che a son stâts fats, e o ’nt fasarìn ancjemò di altris.
__
Ise dacuardi sul insegnament dal furlan a scuele?
Sì, ma ancje li al dipent di cui che lu fâs. Par dî, o ai miôr che i intervents cui fruts ju fasi par esempli une siore di chenti che e cognòs culture e fevele locâl, pluitost che insegnants che a vegnin di fûr, cuntun furlan distant dal nestri.
__
Par finî, mi disie cualchi particolaritât dal Comun che e à voie di pandi?
O aprofiti de ocasion par publicizâ il percors che o vin dilunc des muraiis de fuartece di Gardiscje. In pôcs lis cognossin parcè che une part, chê plui in centri de citât, e je state sdrumade tal ’800 dal guvier Austriac par permeti un disvilup urban miôr, e duncje si disglagnin in lûcs mancul frecuentâts. Muraiis che a àn 100 agns plui di chês di Palme. Cun di plui, in curt si podarà visitâ ancje il cjistiel di Gardiscje, un edifici che vie pai agns al è stât doprât tant che caserme, preson, e tal ultin pal lozament di militârs. In pratiche, nol è mai stât visitabil. Cumò lu vin regolât e al sarà viert al public. ❚
Dree Venier