SIMPRI BOGNS. Valentino Ostermann, Villotte friulane, Udin, 1892

“Buine sere, fantacinis! / Us domandi libertât / Di podèus çhantâ une danze / Cence jessi disturbât // S’o savès une rizzete, / La vorès propi çhantâ, /  Ma no sai dabon nissune / Sôl che dî lalìn-lalâ // Uei çhantâ e jò uei ridi, / Alegramentri jò uei stâ, / Se a cualcùn i fâs fastidi / che si tirin vie di cà.”
E scomence cussì la prime des vilotis racueltis sul finî dal Votcent de bande dal grant studios di folclôr e di tradizions popolârs Valantin Ostermann (Glemone 1841 – Trevoglio –BG- 1904) in chest preseôs volum di 400 pagjinis.
La materie e je organizade par argoment, ven a stâi che, par esempli, intal cjapitul dedicât ae vuere o cjatarìn dome cjantis ispiradis a di chê. No si varà duncje di cirî i titui des vilotis che za o cognossìn, ma avodâsi a leisi dutis lis cuartinis (cuatri viers otnaris, doi plans e doi çoncjâts). I argoments a son une vore svariâts: ligrie, ironie su paîs e su personis, matrimoni, bielece dal om e de femine, fantasiis e desideris di amôr, ricuarts, pâs, zelosie, fedeltât, amôr di patrie, amôr disfortunât, pintiment e v.i. Se si pense che chest gjenar di studi al jere a pene nassût, si pues preseâ ancjemò di plui la opare di Ostermann, no cate che i metodis di ricercje a fossin ancjemò rudimentâls e aprossimatîfs.
Intes 16 pagjinis de introduzion (scritis par talian) l’autôr al mostre di cognossi ben la complessitât de situazion sociolinguistiche dal Friûl (la stesse cjante e pues presentâ variants in montagne, in culine e in planure) e al da cont ancje des racueltis che a jerin stadis fatis prime de sô (Teza, Leicht, Gortani, Arboit, Podrecca). E se di une bande nus fâs fâ muse di ridi la idee di relegâ intun fassicul separât lis cjantis ‘pornografichis’, di chê altre nus gratifiche une citazion tirade fûr dal impuartant periodic L’Illustrazione italiana (1890), che e dîs che i cjants popolârs lombarts no puedin lâ dongje a chei venezians, sarts, sicilians, napoletans e… furlans, “i più profondi di tutti”. ❚
✒ Laurin Zuan Nardin