SIMPRI BOGNS. Giorgio Feringo, Grops, il mecanismo e las ripetizions, Comeglians 2009

“La mê puema a à la vôs scura / lavris ruanis: / il so revoc ravost / al pant il diu dal most / e dai paltans // La mê dumla a à i dincj spiçots / pàs da lova: / tal fis dal bedoêt / a ti studa la sêt / e a ti brova // La mê druda a à ceas lungjas / tetas di lop: / tal puart di Acuileia / a no si dinea / ne pôc ne trop // Il sielâr di Panonia, il mercjadant di Gjudia / il marinâr da l’Orient, il botêr, il bandît / par ‘na pieça di bis / ‘na citula di onzint / a reguei tal so nît // A l’àn cjatada a ôr da Natissa / cul flât stret: / un fanatic cristian / a i à cerût / la fontana dal grim / cul falcèt”.
Chest il test de cjante, Acuileia post Christum natum, la ultime dal librut (Grops) che al compagne i doi cd che a cjapin drenti dute la produzion musicâl di Zorç Ferigo, mancjât, magari cussì no, ai 5 Novembar dal 2007. Si trate di 22 cjançons, registradis in ocasion dai doi concerts tignûts intal 2009, un a Vilecjasse e un a Comeglians, de bande di 21 artiscj-musiciscj e grops musicâi furlans.
Il librut al à un centenâr di pagjinis cui tescj des cjançons par furlan e cu la traduzion taliane, une introduzion di Toni Zogno e une pagjinute finâl di Gian Paolo Gri. E in plui une vore di fotografiis scatadis intai doi concerts.
“…a no son poesias – ven a stâi, a no son robas da lei o da dî; a son tocs da sunâ e cjantâ o da scoltâ”. Peraulis di Ferigo, stes. Vino di crodii? Cheste puema/dumla/druda no nus fevelie di storie, di gjeografie, di costums, di prostituzion, di violence, di fanatisim, no nus fevelie insumis di dutis lis eternis contradizions de condizion umane? No nus contie tantis robis cun pocjis peraulis, come che i parten a la vere poesie? Che po, Ferigo al è stât un poete ancje cence musiche, al è scrit ancje poesie di lei o di dî. Al bastarès memoreâ La nuvicia tal forment.
“E da reò, e al so iust timp, il vuàrdi al palomba / e dut ‘l è salt e dut al plea / al è in flôr il luvinâr ch’al la ingjanarà / al è in flôr il pomâr ch’al la pierdarà / a-è pronta la sêsula ch’a-cjatarà / al iust moment / il cuel / da Nuvicia tal Forment”.
Al è un poete, sì. E no dai plui piçui. Ma al è ancje tant altri: musicist, peraulîr, studiôs, ricercjadôr, om di culture e di impegn intal sociâl, fondatôr dal grop “Povolâr Ensemble” (1978). No si pues sierâ Ferigo intune definizion sole. Ancje par chest al mancje cussì tant.
PS. Di un pâr di agns e je ative la Associazion Giorgio Ferigo, che la Patrie e à za vût fevelât di jê, intal numar di Avrîl dal 2012. Spie il sît www.giorgioferigo.net ■
Laurin Zuan Nardin