SIMPRI BOGNS. Adriano Nascimbeni, Il secuestri di Catine, Pasian di Prât, 2015

«Nissun al varès imagjinât che, in chel piçul paîs de Basse furlane, che o clamarin cul non di fantasie di Borlaç, al podès sucedi il rapiment di une fantate di disesiet agns.
Dut câs la int, dopo che chel brut fat al jere avignût, e diseve che alì la sole persone che si podeve pensâ di puartâ vie par vê un riscat e je propit Catine Fez».
Adriano al à usât i sei letôrs a chescj siei incipit in medis res.
Che a metin daurman intal plat la pitance che e sarà l’argoment dal libri. E ancje in cheste sô ultime (par cumò) vore, la pitance e je mareose: doi pôc di bon a secuestrin une zovine par cuistion di bêçs.
A son doi fradis, un plui trist, un mancul trist, ma ducj i doi avonde imbranâts. E, duncje, ancjemò plui pericolôs. Po al è Meni, il pari de frutate, che, ancje chel, nol è farine di fâ ostiis di comunion.
In pocjis peraulis, ducj i ingredients par fâ su une tragjedie, che l’autôr le pronte cu la sgrimie di un che al sa doprâ la pene e che al sa movi i personaçs.
La fotografie de cuviertine nus mostre i voi suturnis di une Catine che, cu la sô musute nete e inocente, e pâr che e interoghi il mont sul parcè di chê violence.
Cenonè intun moment dut al si ribalte. E Nascimbeni al si rint cont benon che al è daûr a ribaltâ la sô pitance. E al fas ricors a une gjenialade: «Mi coventarès la pene di un Manzoni par descrivi ben chel che al jere sucedût a Meni la gnot prime, une sorte di conversion che, tal so piçul, e someave un pôc a chê dal Innominato.
Sicome no le ai, contentaitsi di chel al al passe il convent». Un mût une vore elegant di inviâ il romanç viers chel happy end che magari no si lu spietarès, viodudis chês premessis, ma che al somee jessi une costante dai romançs di Nascimbeni.
Il libri al è scrit in dôs versions: furlane e taliane, par vie che a son dôs lenghis sûrs che, intal pinsîr dal autôr, a àn di convivi in armonie, par insiorâ la culture de nestre int. E alore o disìn che ancje lui al à zaromai dât plui di un contribût in cheste direzion. ❚
✒ Laurin Zuan Nardin