Sêstu nordestin? No, furlan e vonde!

Un biel dopomisdì de ultime dì di Setembar dal an passât a Udin.
“Bundì Roberto”. “Bundì Diego. Cemût achì?” “O soi in citât par un incuintri in Filologjiche, ma o soi adore. Cjolistu un tai?” “Vulintîr. O sin juste denant di une buine ostarie. Nin dentri achì.”
◆ Sentâts cu lis gjambis sot dal taulin e denant di doi tais di tocai biei frescs, o tachi: “Âstu let ce che al à scrit Possamai tal Messaggero Veneto, che esiste un comune denominatore tra il Friuli – Venezia Giulia, il Veneto e il Trentino?” “Se lu ai let?! Mi à fat vignî sù il bacalà dal Vinars Sant! E varès di sedi la linie de NEM, la gnove societât parone e editore di ducj i cuotidians di chestis regjons, propit chê di sburtâ la nassite di une identitât dal Nordest o nordestine.”
“Za o vin in cjase – o zonti jo – chê cjastronade di Io sono FVG che e cîr di meti dentri tal cjâf di cui che al è furlan o triestin che nol è furlan o triestin ma Io sono friulveneziangiuliano, identitât impussibile parcè inesistente, cumò o vin denant ancje un tentatîf di gloti il Friûl dentri di une identitât trivenite o nordestine!”
“No si pues tasê – al va dilunc Roberto – ancje parcè che il diretôr Possamai al à sostignût che e je l’economia fattore connotante un corpo sociale e che duncje i gjornâi di NEM a tacaran de economie per declinare il comune denominatore del Nord Est. Rispuindìno?”
“Merete rispuindi, sigûr! O vin il dovê di contâle juste, po no po! Ma nus publicarano la rispueste?” “Intant le scrivìn. Se no le publichin, le slargjarìn in altris mûts!”
“Benon! Butìn jù une rispueste pulide! Cumò o scuen lâ – o dîs parant jù la ultime glotude di tocai – Ti mandi usgnot cualchi idee di rispueste par e-mail e tu fâs ancjetant. Mandi Roberto”. “Mandi”.
◆ Tal doman la rispueste e je pronte e mandade al Messaggero Veneto. Dopo dîs dîs il nestri scrit al jes sul gjornâl.
Us met achì in struc ce che o vin butât jù, cu lis premessis a pene contadis.
◆ Cun rispiet pes sieltis di gjestion de societât NEM, che no nus tocjin a nô (ancje parcè e je za impiade une fuarte proteste dai gjornaliscj jessude tun comunicât da Associazion de Stampe dal F-VJ), no si cjatìn par nuie dacuardi te sfuarçadure di Possamai cuant che al definìs “il profilo identitario che caratterizza il Nord Est” tacant de economie. O sin convints che no dome la economie des trê regjons menzonadis e vedi situazions che no si puedin omologâ, parcè che a son disomogjeniis par cualitât e par cuantitât, ma soredut che il lôr cuarp sociâl, storic, culturâl e fintremai linguistic al mostredi diferencis cussì penzis di no podê jessi cjapât dentri di un profîl identitari unic.
◆ Che al sedi clâr che marcâ lis diferencis jenfri furlans e venits o jenfri trentins e triestins nol vûl dî mai e po mai sieradure cuintri di nissun, ma vê cussience che lis diversitâts a son ricjecis di valorizâ par fevelâ in mût coret cun ducj. Une sfuarçadure identitarie nordestine no varès il just rispiet di ogni identitât. Cun di plui il tiermin “triveneto“, burît fûr dal nazionalisim talian e imponût dal fassisim par platâ o scancelâ de gjeografie il Friûl, la Sclavanie o il Südtirol, nol varès mai di jessi doprât par no ofindi la dignitât di chei popui che a àn patît une vore di violencis in chê volte e che, cumò, a son biadelore ricognossûts e tutelâts de Costituzion.
◆ Se il diretôr Possamai al scrîf che il progjet origjinari di NEM al jere “dare rappresentanza ad un territorio e ad una comunità che meritano di essere rappresentati …” o scugnìn marcâ che comunitât e vûl dî [Oxford Languages]: “Complès di personis metudis adun di rapuarts sociâi, linguistics e morâi, leams organizatîfs, tradizions e interès comuns”. Il cussì clamât “Nord Est” al è duncje fat di diviersis comunitâts che a meretaressin ognidune une informazion, ben si intint vierte al difûr, ma cjalçade juste su di ognidune, cu la vicinance e la sensibilitât che e covente. Nô no sin editôrs di gjornâi ma nus somee che propit cheste sensibilitât e podedi incressi l’agrât dai letôrs cuntun risultât positîf dai numars di tiradure.
◆ Ancje dal pont di viste aministratîf lis regjons dal cussì clamât “Nord Est” no son omogjeniis. Podìno sconfondi la autonomie ordenarie dal Venit cu la autonomie speciâl ricognossude de Costituzion al Friûl – Vignesie Julie, cu la motivazion ancjemò valide de presince, câs unic, di cuatri lenghis uficiâls e di trê minorancis linguistichis, chê furlane, chê slovene e chê gjermanofone? No covente po nancje fevelâ dal câs particolâr des provinciis autonomis di Trent e Bolzan!
◆ Par esperience o crodìn che ai furlans jessi etichetâts “Nord Est” ur fâs vignî iniment chei agns cuant che il Friûl al jere calcolât un cjanton adalt e a drete de Italie, cu lis monts blancjis di nêf e fredis a Nord e cu la buere glaçade de Est. O sin a “Nord Est” dome se o vignìn cjalâts di Rome.
◆ Il Friûl, invezit, massime in chest timp di vuê di viertidure dai confins dai Stâts “nazionâi” al podarès e, par nô, al dovarès tornâ a imparonâsi di chel rûl che al à simpri vût dentri de sô anime par doi mil agns: chel di jessi protagonist di incuintris di culturis e di relazions jenfri popui latins, todescs e slâfs, no intun cjanton a Nord Est de Italie ma viert a Nord e a Est, tal cûr de Europe. ❚