SCUELE. Marilenghe materie curicolâr? Sì, ma si à di fâ di plui

Par plui di cualchi famee al pareve aromai un sium podê viodi che, daspò vê domandât che i siei fîs a podessin imparâ il furlan a scuele – o ben sfrancjâsi tal scrit, te gramatiche e tal lessic, stant che te fevele e je stade la lenghe cun chê che a àn imparât a dî “mame” –, sui bancs si des une rispueste.
E invezit cul an scolastic che al ven e sarà une realtât. Cun di fat, il furlan al devente une materie di curriculum, ven a stâi cjapade dentri tal troi uficiâl de scuele cu la stesse dignitât di chês altris materiis e no plui, come che al jere fintremai cumò, come “progjet par slargjâ la ufierte formative”.
COMISSION DI ESPERTS_ La gnove e à vût sul finî dal mês di Març un pas fondamentâl, cuant che la Zonte regjonâl e à nomenât la Comission di esperts par il coordenament dal insegnament dal furlan te scuele (Paola Cencini, Gloria Aita, Federico Vicario, Fabiana di Brazzà, Giorgio Gianfranco Pascoli).
Tal concret, a saran 30 oris intun an: 1 ore par setemane, te scuelute e tes scuelis elementârs. Tes mediis ancje par il prossim an si continuarà, invezit, cui progjets. L’insegnament si fasarà cui bêçs de Regjone, 1,8 milions, al à dit l’assessôr ae Istruzion, Roberto Molinaro, che al à zontât: «O vin domandât al Stât di sostignî la operazion insiemit, ma fintremai cumò la rispueste no je stade positive».
Par l’insegnament, si fasarà riferiment a chei 252 docents che si son iscrits ae Liste regjonâl cun competencis ricognossudis par l’insegnament dal furlan, ven a stâi cui titui necessaris che a son stât fissâts dal Ufici scolastic regjonâl.
Il furlan tal curriculum «e je la risulte di doi agns di vore – al à zontât Molinaro –, che a àn compuartât la aprovazion dal Regolament de leç 29/2007. Un troi dulà che no son stadis pocjis li dificoltâts, par vie che a nivel talian la pupilance des lenghis mancul pandudis, soredut te istruzion, no je ricognossude tant che impuartante». E dut chest no cate la leç statâl 489 dal ’99. «Achì però oltri lis leçs – al è lâ indenant Molinaro –, e je di rispietâ la volontât des fameis: in Friûl une famee su dôs e à domandât il furlan a scuele».
PDL TRIESTIN CONTRARI_ Duncje dut benon? Ancje l’assessôr al ricognòs che 30 oris di furlan intun an no je une bondance «O savìn che si podarès fâ di plui, ma o vin decidût di scomençâ cun gradualitât». E bielzà cheste si è tirade intor une sglavinade di critichis di doi dai cuatri conseîrs regjonâi triestins, Piero Camber e Maurizio Bucci. «Robis di no crodi», a àn spesseât a declarâ. Cheste dal furlan a scuele e je “une marchete eletorâl” (ma il Friûl no isal agns che al è in spiete?), «une marchete di sagre di paîs», al à dit Bucci. Subit pront a zontâ che la decision de Zonte regjonâl no varà efiets tes scuelis di Triest, par vie che alì «si insegnin dome lenghis zovevui».
E son osservazions critichis par lâ indevant e fâ di plui, invezit, chês di Silvana Schiavi Fachin, za docent universitarie e esperte di plurilinguisim. «Te politiche linguistiche regjonâl dal 2007 in ca si veve di meti in prin plan la formazion dai insegnants. Par insegnâ l’inglês e je la catedre di inglês e cussì pal talian. Parcè no creâ un catedre di furlan»? ■
Antonella Lanfrit