Screât il restauri de Cjase de Ete di Mieç di Cividât, che cumò e il public le podarà visitâ

Daspò i lavôrs di sistemazion, il mês stât, ai 15 di Avrîl dal 2015 e je stade screade la “Cjase de Ete di Mieç” di Cividât. I lavôrs a son lâts indenant cun timps svelts, tant che il progjet – presentât intal 2013 – al è stât metût in vore intal Otubar dal 2014 e al rivât insom juste cumò, rispietant i timps previodûts. Il progjet di sistemazion e di gjestion al à vinçût il prin premi dal bant 2014 par “Progjets integrâts public/privât pe realizazion di servizis ricreatîfs e par ativitâts culturâls, dentri dal Program regjonâl pal disvilup rurâl 2007/2013, Asse IV Leader”, inmaneât dal Gal Tor Nadison. Duncje, il Comun al à podût finanziâ i lavôrs di mût di rivâ a vê un restauri cetant rispietôs dal pont di viste struturâl e storic. Il finanziament al è stât domandât adun cu la associazion Ambientarti: di fat, il bant al jere par un progjet inmaneât insiemi di public e privât. Il Comun al veve di regolâ la cjase e ae associazion i spietarà viodi di jê. Daûr di un studi fat dal storic cividin Tagliaferri intal 1980, ripuartât de storiche Silvie Zamboni vie pe scree, forsit la cjase e jere tal imprin une tor, stante la sô forme cuadrade. Dome daspò dal riviel dal 1378, butade jù la spice de tor, e deventarà la cjase di un artesan. A ogni mût, un manufat impuartanton rivât di in chê volte fin ai nestris timps.
La associazion Ambientarti e à cjapât sù il compit di sistemâ i ambients: al plantiere si cjate la buteghe dal oresin e forsit sot e jere ancje une cjanive; al prin plan e je la cjamare di durmî e al secont plan e je logade la cusine, che e je la stanzie plui grande li che si cjate il cjamin, chest par vie che plui curte e jere la fumarie e mancul pericul al jere che al cjapàs fûc dut. Po dopo, daûr de cjase si cjate un piçul curtîl cuntun porton che al da su chê altre androne.
In cheste maniere, Cividât al recupere un toc une vore biel de sô storie, che cumò a puedin viodi ducj: une testemoneance uniche intal so gjenar. ❚
Redazion