“Scoltâ, ricuardâ, contâ” cul lunari di pre Beline

Al è a disposizion il lunari 2019 di pre Antoni Beline, che pal gnûf an al varà tant che teme “Scoltâ, ricuardâ, contâ”. Pre Antoni al è mancjât tal 2007, ma no dome nissun si è dismenteât di chest om di glesie, mestri e scritôr, protagonist de vite e de culture furlanis che tant al à fat pal Friûl, ma a Visepente di Basilian, là che al jere plevan, al è ancjemò cualchidun che al continue a fâ il lunari che lui al veve tacât a realizâ prime di murî. Cun chel lavôr, pre Antoni al tirave dongje un franc che po al meteve a disposizion dal grup “Amici di Udine”, impegnât a judâ la int dal Benin: Alida Pevere e Cristian Liberale, za di dodis agns, a curin cun dedizion il lunari a lui dedicât. Alida e sielç jenfri i scrits di meti dentri dal Lunari e Cristian i da une man a metilu dongje: chest an, a àn sielzût il titul “Scoltâ, ricuardâ, contâ” par inviâ une riflession su la necessitât di ricuardâ i messaçs impuartants, intune ete dulà che al passe dut masse di corse. Alida e Cristian a àn simpri podût contâ sul jutori di tancj artiscj dal teritori furlan che a metin a disposizion lis lôr creazions par fâ inmò plui biel il calendari.
Te edizion pal 2019 si puedin preseâ i lavôrs di Marina Coccolo, autore de cuviertine, Sandra Di Lenardo, Mariateresa Bravin “Titti design”, Ezio Cescutti, Roberta Ciriani, Otto D’Angelo, Vera De Tina, Gianni Di Lena, Daniele Giacomini, Mario Mussinano, Marisa Plos, Fausto Tosolini e Anna Zamolo.
Il lunari al è stât presentât ai 4 di Novembar a Visepente. Fin in Zenâr, si lu cjatarà in glesie e tal bar “Al Mattiniero” di Visepente, tal bar edicule “Ogni bene” a Basilian, te edicule di Bertiûl, te edicule “Da Maurizio” a Codroip, inte cartolarie “Cartoltecnica” a Cjampfuarmit, tal “Bar Masino” a Mels di Colorêt di Montalban, tal “Minimarket da Lidia” a Maian e intes glesiis de Plêf di Vît, Clausêt e Pinçan. I bêçs racuelts de vendite dal lunari a laran a pro des missions in Benin. ❚
Piero Cargnelutti